KUCHING: Peranak ba Ulu Entabai enggau Ulu Kemalih deka ngasaika pengelantang pengudah Jalai Rumah Kedit, Sungai Buluh enggau Sekula Primari (SK) Ulu Entabai tembu ila.
Ungkup pengawa nya, Adun Meluan, Rolland Duat Jubin udah nyuaka chek pampas tanah penyampau RM1,551,552.74 ngagai 73 iku penerima.
Ku iya, jalai pemanjai 10 kilometer (km) enggau standard R3 Opis Kereja Raya (JKR) udah berengkah dipejalai ba taun 2019.
“Penembu jalai tu ila deka ngemanah jalai penyambung peranak ba Ulu Entabai enggau Ulu Kemalih ngagai sitak Pakan.
“Pengawa nyuaka chek pampas tanah udah disempulang Menteri Muda Pemansang Mengeri, Pengatur Tanah enggau Rampa Menua, Datuk Len Talif.
“Aku meri besai terima kasih ngagai Perintah Sarawak ke semampai siru enggau ngerumban pemansang di menua pesisir,” terang Rolland.
Iya madah, jalai tu mega deka ngemuntangka peranak dia ngagai SK Ulu Entabai enggau berubat ngagai Klinik Nanga Kemalih ke disadang tembu enda lama agi.
Sama datai Adun Pakan, Tan Sri William Mawan, Penguasa enggau Pegawai di Opis Tanah enggau Survei Bagi Menua Sarikei, tuai raban bansa enggau bala bukai.
