KUCHING: Bisi 75 kluster benung ngerekai di Sarawak diatu pengudah empat kulster baru nambah sehari tu iya nya ditemu ba pelilih menua Miri, Kanowit enggau Selangau.
Komiti Penyangga Penusah Ngenyit Nengeri (JPBN) dalam siti penerang media tadi madahka dua kluster baru ditemu ba Pelilih Menua Miri, siti di Kanowit enggau siti di Selangau.
Dua kluster bari ti dirikodka ba Miri dikumbai Kluster Jalan Agama enggau Kluster Air Padang.
Kluster Jalan Agama ngaul sebuah palan pelajar di Miri ngaul kes indeks beumur 57 taun ti diperesa ketegal bisi nunjukka kelai kena rampit Cocid-19.
Bisi 95 iku udah diperesa ke alai 38 iku ditemu positif Covid-19, 11 iku negatif lalu 46 agi nganti pemutus peresa makmal.
Kluster Air Padang mega ari Miri ngaul sebuah ejensi perintah datai ari kes indeks laban bisi nunjukka kelai dirampit lebuh diperesa ba Pelilih Menua Kuching maya ngelawa ruang bilik iya.
Urung 203 iku udah diperesa ba baruh kluster tu ke alai 19 kes ditemu positif Covid-19.
Kelimpah ari nya, Kluster Sungai Ranan di Pelilih Menua Kanowit ngaul sebuah komuniti ari dua buah rumah panjai di Sungai Ranan, Kanowit.
Kes datai ari kes indeks ti ditemu bisi nunjukka kelai ba Sepital Kanowit.
Pengawa ngiga enggau meresa ngaul ruang bilik kes sereta raban bekaul enggau kes indeks benung dipejalai nyelinting orang di rumah panjai.
Kluster ti kepenudi iya nya Kluster Nangga Taja di Pelilih Menua Selangau mega ngaul sebuah komuniti di rumah panjai Nangga Tajam, Selangau.
Kes ditemu ari kes indeks ti diperesa ba Sepital Sibu kena 26 April tu tadi.
Bisi 104 orang udah diperesa ke alai 34 iku udah ditemu positif Covid-19.
Berebak enggau nya, JPBN madahka Pelilih Menua Julau bebali ngagai status mirah pengudah ngerikodka 43 kes berampit dalam timpuh 14 hari.
Pelilih Menua Belaga kemari bebali ngagai status oren ngujungka pelilih menua ba status oren naka diatu bisi lima buah.
Pia mega, Pelilih Menua Kabong enggau Marudi udah bebali ngagai status kuning ari status oren laban semina ngerikodka 17 enggau 20 kes berampit dalam timpuh 14 hari.
Ba pekara bukai, JPBN mega madahka pemutus empat buah genturung pendiau deka bejalaika Atur Mindah Betagang Diteritka (PKPD) mungkur Rh Rampai Sungai Anyit Selangan di Sarikei (Bepun 30 April nyentuk 13 Mei 2021), Rh Chan Minggat, Sungai Kesa di Sarikei (Bepun 30 April nyentuk 13 Mei 2021), Rh Payau Emperan Datuk, Sungai Pinang di Pakan (Bepun 30 April nyentuk 13 Mei 2021) enggau Kpg Sagah di Kuching (Bepun 30 April nyentuk 13 Mei 2021).
