KUCHING: Rayat menua tu ke tepagang gawa ba Kapal Bigfoot 1 di Romania ketegal dipejal gawa sereta diulun (nadai begaji) deka dibai pulai ke Malaysia sehari tu enggau chara berenggat.
Nitih penerang siku sida ke gawa ba kapal nya, Andrian Ambas Richards, juluk sida pulai ke Malaysia nyadi nyata nengah bantu Datuk Seri Wan Junaidi ke berandau terus enggau Duta Malaysia di Romania, Tuan Yang Terutama Abdullah Zawawi Tahir enggau pemesai Konsul Amera awakka berunding enggau piak perintah Romania.
“Duta bisi datai ngelawa kami lalu nganjung kami ngena dua buah bas ke hotel lalu nyuaka dokumen beguna dikena mai kami pulai ke Malaysia,” ku Andrian ke mega peranak Bintulu.
Andrian madah nengah bantu Perintah Malaysia enggau kaul ke manah enggau Perintah Romania, pengawa mai sida pulai pengudah ke diulun gawa teputar.
Dulu ari tu, ku Adrian piak kompeni kapal bisi ngemba sida laban ngaga kompelin sereta minta bantu piak duta din.
“Nyau deka semua kami nadai dibayar gaji baka ke udah disemaya ba surat konterik lalu bisi udah terima gaji tang semina naka bulan September.
“Maya kami ngaga bantah bepun 5 November tu tadi lalu minta dibayar gaji, sida kompeni kampal mayuh kedalih enggai meri kerejasama tang majak mejal kami gawa,” ku iya maya dirandau Suara Sarawak kemari.
Berebak enggau nya, Andrian ngarika 83 rayat Sarawak ke dituntung penusah ba menua Romania nya meri terima kasih ngagai Datuk Seri Wan Junaidi laban udah nyaup sida pulai ke menua.
“Kami berasai gaga lalu diatu ngasaika diri likun pengudah dibantai pengari perintah Sarawak enggau perintah Malaysia,
“Terima kasih ngagai Duta Malaysia laban udah ngatur pemulai kami enggau likun bepun sehari tu (kemari),” ku iya.
Andrian madah nyau deka semua sida ke gawa ba kapal nya dipenyati lalu rayat Sarawak ke beumur urung 2 ngagai 60 taun.
Berebak enggau nya, Andrian sekali agi minta saup Perintah Sarawak mantu sida mayar ungkus kuarantin lebuh datai ba Kuala Lumpur ila.
“Tebal agi kami nadai gaji lalu nadai belanja dikena mayar ungkus kuarantin kediri. Nya alai, kami ngarapka Perintah Sarawak mantu mayar ungkus kami kuarantin maya udah datai ba Malaysia ila,” ku iya.
Penusah ditapi Andrian tebantai pengudah siku ari sida sebilik betelefon ngagai pemberita minta mantaika penusah ke nuntung bala sida ti jauh ba menua orang.
