897,142 hektar NCR disukat

BAU: Perintah Sarawak mujur nyukat 897,142 hektar (2,216,838 ikar) ngena chara baru sukat kelingi tanah enggau lot individu tanah Adat Bansa Asal (NCR) di baruh inisiatif baru dalam timpuh semilan taun.

Sapit Kepala Menteri Datuk Amar Awang Tengah Ali Hassan madah, pekara tu udah nunjukka pengawa nyukat tanah ulih dirumban, tiga kali lipat ari chara lama.

“Dalam timpuh 50 taun sebedau tu, semina 260,000 hektar (642,460 ikar) aja tanah NCR tembu disukat ngena chara lama nya.

“Pengawa tu mega udah ngelala enggau ngaku tanah NCR diempu Bumiputera Sarawak.

“Entara tanah ti dikelai ngena chara nyukat kelasa satu sereta dirikod dalam kar kadastra lalu nadai ngira sapa ulih nyidi baru tiang pol ba tanah nya enggau nadai mayuh kelikuh,” terang iya.

Nya alai ku iya, pengawa nyukat lot individu ditampung ngagai menua ke udah disukat kelingi sereta digazet di baruh seksyen 6 Kanun Tanah Negeri.

“Tuduh sekeda piak ngumbai pengawa nyukat kelingi tanah di baruh Seksyen 6 enggau niat ngerampas tanah NCR, jaku ti bula sereta semina ngajum penemu rayat ngena politik.

“Nadai sebarang tanah Seksyen 6 dirampas Perintah Sarawak ungkup pemansang dagang besai kenyau ari program tu dipejalai,” ku iya.

Iya mansutka jaku nya rambau Pengawa Nyuaka Pala Tanah Seksyen 18 Kanun Tanah Negeri di baruh Pengawa Nyukat Renggat Kedua Program GTP, Kampung Tradisional enggau Sitak Pemansang Salcra ba Dewan Suarah Bau ditu, malam tadi.