951 KRT di Sarawak bela diberi geran RM6, 000

KUCHING: Bisi 951 buah Genturung Tumpuk Pendiau (KRT) ba selampur Sarawak deka nerima geran sepenyampau RM5,706,000.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka genap KRT deka diberi geran ngatur program sepenyampau RM6,000.

“Pekara tu seriris enggau juluk ati Opis Menteri Penyerakup Menua ti deka nyapai Pelasar Penyerakup Menua awakka ulih mansutka sebuah menua ti aman sereta ngerapitka kaul rama ti bepelasarka Konstitusyen Perintah enggau Rukun Negara.

“Entara pekara ti deka digaga iya nya negapka sereta ngatur struktur pejalai enggau meransang raban komiti KRT,” ku iya.

Fatimah madah munyi nya pengudah nyuaka geran Pengatur KIR ngagai Chairman KRT RPR Siol Kanan/ Taman Sukma ngarika KRT Nengeri Sarawak Andrew Affendi Shukri di Begunan Baitulmakmur ditu, tadi.

Ku iya, program tu dichakahka baru dikena meri penyedar enggau nanam ulah ngembuan tanggungpengawa ‘kepimpinan’ komuniti nengah tumpuk pendiau enggau ngatur aktiviti tauka program penyerakup.

“Aktiviti enggau program nya ila deka ngintu pengelantang mensia mayuh sereta ngaul kerejasama chakah komuniti mungkur semangat volunteer.

“Dalam mantu perintah nyapai pekara tu Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit (KWKPK) udah nyadi bakih kunsi Opis Menteri Penyerakup Menua sereta nyadi pemantu pemadu beguna dalam pejalai pelasar enggau pelin program nya,” ku iya.

Ku iya, KWKPK deka bekerejsama enggau Opis Penyerakup Menua enggau Intergrasyen Nasional Nengeri (JPNIN) Sarawak ungkup tuju nya.

Suara Sarawak