ARTIKEL

TABI PUJI… Aisyah (dua kanan) mujur dipadu nyadi Mini Miss Global 2024 serta ngalah lapan penyereta bukai.

Aaisyah Batrisya Putit dipadu nyadi Mini Miss Global 2024

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

MALAM 8 March (Hari Lima) nyadi hari ti pemadu berega enggau besai reti ba siku nembiak indu ti benama Aaisyah Batrisya Putit, 8.

Iya tampak agi dikelala ngena nama Aisyah mujur dipadu nyadi champion Pekit Mini Miss Global 2024 ti diatur ba Kuala Lumpur.

Nambahka nya, iya mega siku penyereta nembiak mit keterubah ti ngarika Malaysia mujur champion ba pekit Kumang ba tikas dunya.

Aaisyah Batrisya Putit

Penyulut iya ba pekit nya mujur ngemegah enggau nyaguka nama Malaysia kelebih agi Sarawak ba mata dunya.

Aisyah mujur ngalahka lapan penyereta nembiak bukai ti datai ari Indonesia, Malaysia, Combodia, Uganda, South Afrika, Laos, Filipina enggau India.

Nangkan nya, penyereta ari Indonesia, Naura Irawan menggi penuduk kedua lalu ditangkanka penyereta ari Filipina, Althea Frhanccine Parco Balala enggau Malaysia, Jemah Ammara ti bela ba penuduk kedua enggau ketiga.

TERIMA KASIH… Penyulut Aisyah ba pekit nya endang berekat ari pengepuh sereta pengeransing Angela (kiba) enggau Viviana (kanan) ngembing iya ba AIM kelimpah sukung semua orang.

Dulu agi ari nya, gelar Mini Miss Global 2023 dipenggi penyereta ari Thailand, Chinbee Patthariya Tan Suwannurak.

Lebuh dirandau Ruai Suara Sarawak kemari, Aisyah madahka diri berasai gaga, beterima kasih, tekenyit enggau temegah maya dipadu nyadi Mini Miss Global 2024.

Iya mega madahka diri temegah ati mujur ngukir nama Malaysia kelebih agi Sarawak ba panggau dunya nengah pekit nya.

KENANG BEREGA… Aisyah begambar ungkup kenang enggau Pemungkal Tiara Management, Nickson Sim (kanan) sereta Leading Management, Leo Reynald (kiba).

“Ba malam berega nya, udah tentu aku berasai gaga enggau temegah laban dipadu nyadi champion Pekit Mini Miss Global 2024 lalu aku meh penyereta nembiak mit keterubah ti ngarika Malaysia champion ba pekit tu ba tikas dunya.

“Aku mega ngembuan pengandal ati ti besai ngagai diri empu ulih champion ba pekit tu laban aku udah lama nyikap diri ba mayuh sukut.

“Taja pia, lebuh nama aku disebut nyadi champion pekit tu, aku chukup tekenyit laban bala penyereta bukai bela ngembuan pengelebih kediri empu.

RANSING… Aisyah ransing belatih begulai enggau mentor iya, Viviana.

“Engka tu udah jereki diberi Tuhan ngagai aku.

Nya alai, aku beterima kasih ngagai Tuhan enggau semua orang ti udah bebendar mantu aku nyapai penyulut tu.

“Tu ukai penyulut aku kediri tang penyulut semua orang kelebih agi bala mentor, kami sebilik, bakih enggau ti bukai.

“Enti nadai sukung ari semua sida udah tentu aku enda ulih manggai ba tikas tu. Nya alai, aku beterima kasih ngagai semua sida,” ku terang Aisyah.

Iya ngarap dudi hari, mayuh agi bala nembiak mit ngaul pekit Kumang nyentuk ngagai tikas dunya sereta ngemegahka Malaysia enggau Sarawak.

TEREBAI JAUH

Pemungkal Angel Impact Management (AIM) ti mega siku ari mentor Aisyah, Angela Martin madahka diri chukup temegah enggau gaga ati laban pengelelak sereta pengiruh sida sebuat ngelama tu mujur mansutka asil.

Iya madah, semua bala penyereta ti masuk pekit nya endang bepenau enggau ngembuan pengelebih kediri empu tang sekali tu engka udah jereki Aisyah.

“Aisyah endang patut ngempu gelar tu laban iya siku nembiak ti ransing, bebendar enggau ngembuan pengandal ati ti besai ngagai diri empu sekumbang ti belatih.

“Keterubah suba, iya siku nembiak ti malu tang kami duai anak aku, Viviana Lin Winston enda leju matih enggau nempa pengandal ati iya.

“Sekumbang berengkah belatih nyikap diri masuk pekit tu ba bulan Januari 2023 nyentuk diatu, Aisyah jauh udah berubah ari siku nembiak ti malu nyadi nembiak ti ngembuan pengandal ati besai ngagai diri empu.

“Ba aku, Aisyah tu ulih terebai tinggi enggau jauh agi enti iya udah besai ila laban iya nembiak ti pintar. Munyi ku orang beauty with brain!” ku penanyi veteran ti mega ex-Kumang Gawai Nengeri Sarawak nya.

Iya madah, naka diatu, Aisyah deka ngemeratka pelajar diri tang ba maya sebaka iya nyadi duta Mini Miss Global 2024 enggau deka bejalaika mayuh pengawa pengasih.

Ungkup penerang, AIM berengkah ditumbuh ba bulan Ogos 2018 ti bepalan ba Tiya Vista, Samarahan Expressway, Kota Samarahan.

AIM bisi nyendia kelas catwalk ungkup bala Kumang, model, nganta, pengelandik bekomunikasyen enggau ti bukai.

Pia mega, sida angkun bejalai pengawa pengasih begulai enggau bala nembiak ba baruh perabung AIM.

Angela kala ngerikod enggau ngeluarka lima album solo urung taun 90-an sereta suah champion ba pekit Kumang.

Nya nyengkaum Pekit Kumang Gawai Renggat Nengeri Sarawak 1995, Pekit Mrs Kebaya Sarawak 2016, Lima Pemadu Atas (Top 5) Mrs Malaysia Kebaya 2016, bulih Anugerah Sarawak Diva Queen 2018, kala dipasuk ba Bup Successful People in Malaysia ti dipilih British Pedia enggau mayuh agi ti bukai.

Anak iya, Viviana ti nyadi pengajar catwalk ba AIM kala champion ba Pekit Miss Planet International 2019 sereta nyadi indu Iban keterubah menang ba pekit Kumang ba renggat antarabansa.

BERITA LAIN

Dua pendam lama di Song disengkubang

SONG: Dua pendam Iban ditu udah disengkubang orang nadai tanggungpengawa ba penusah diripot nyadi kena 20 enggau 22 Mei tu tadi. Tuai Polis Pelilih Song,

Kaul komuniti Dayak meruan teguh

LUNDU: Penyerakup komuniti Dayak diatu chukup teguh taja ari bemacham raban etnik, ku Sapit Premier, Datuk Amar Douglas Uggah Embas. Iya ti temegah beratika pekara

BERITA TERBARU