KUCHING: Nembiak Kolej Pelajar Seni Kreatif Universiti Teknologi MARA (UiTM) Pampang Sarawak Muhammad Abal Hakim Abal Mukam udah ngemegah nama menua pengudah mujur ngempu penuduk lumur tujuh ba Pekit Dunya Profesional Bertauliah Adobe Certiport 2023.
Nya ngujungka anak asal Sabah ke beumur 19 taun tu mujur bulih penuduk 10 pemadu atas langkar pemadu manah ari 44 pemekit ba pekit kepenudi ti diatur ba Orlando, Amerika Syarikat (AS) kena 28 Julai nyentuk 3 Ogos tu tadi.
Penyulut nya mega udah mai tuah ngagai Abal Hakim mai pulai perais mata duit USD250 enggau setipikit.
Berebak enggau nya, Abal Hakim lebuh ditanya pemberita madahka diri berasai temegah laban udah nempa penyulut sereta ngemegahka nama UiTM enggau Malaysia.
Ku iya, rambau pekit sida dipinta ngaga poster ngena rambai jaku ‘refugees’ ba timpuh lapan jam.
Taja pia, iya madahka diri mujur nembuka pengawa nya ba timpuh enam ngagai tujuh jam aja.
“Aku bepadan enggau pemekit ari menua bukai ba serata dunya nyengkaum ari menua New Zealand, Sweden, China, Taiwan, Indonesia enggau ke bukai.
“Ngulu pekit tu siti peneleba ti chukup berega laban aku ulih belajar pekara baru, budaya baru enggau bulih bakih baru.
“Raban pengatur mega ngatur pekit tu enggau manah lalu aku berasai gaga,” ku iya lebuh ditanya pemberita ba Palan Penerebai Bilun Antarabansa Kuching (LTAK), kemari.
