Abang Jo keterubah diberi vaksin di S’wak

KUCHING: Kepala Menteri Datuk Patinggi Abang Johari Tun Openg nyadi orang keterubah di Sarawak dituchuk vaksin Covid-19 sehari tu.

Sapit Kepala Menteri Datuk Amar Douglas Uggah Embas madahka Abang Johari deka betuchuk vaksin nya di Klinik Pengerai Petra Jaya.

“Kami dekaka rayat Sarawak nemu Abang Johari nya orang keterubah dituchuk vaksin tu,” terang Uggah.

Uggah mansutka jaku nya ba aum pemberita pengudah ngambat penatai vaksin keterubah bansa Pfizer-BioNTech ba Sarawak di Gudang Raya Airway (DHL), Padang Bilun Entarabansa Kuching (LTAK), ditu ensanus.

Sama datai Menteri Kaunsil Kandang Menua enggau Pengawa Berumah, Datuk Seri Dr Sim Kui Hian, Sekretari Perintah Sarawak Datuk Amar Jaul Samion enggau Direktor Pengerai Sarawak Dr Chin Zin Hing.

Kena Hari Tiga tu tadi, Sarawak nerima 23,400 dos vaksin Pfizer-BioNTech ari Perintah Besai.

Beduduk ari nya, program betuchuk vaksin deka berengkah dipejalai sehari tu ungkup raban gawa ba luan di Kuching enggau Sibu.

Suara Sarawak