PUSA: Premier Sarawak, Datuk Patinggi Tan Sri Abang Johari Tun Openg disadang datai ngulu Program Ngelalu Pengabang Gawai Raya ba Laman Tandang Sari kena 3 June tu.

Kaban Parlimen Batang Lupar, Mohamad Shafizan kepli madah, penatai tuai lumur satu Tanah Kenyalang nya endang dianti komuniti ditu.

Ku iya, nya keterubah Abang Johari ngabas rayat diri dia pengudah Pengawa Bepilih Besai (PRU) enggau pengawa numbuhka Perintah Penyerakup.

“Laban nyadi siku orang ti dikeandal iya belaban (ba PRU tu tadi) sereta diberi pengandal ari rayat, aku chukup gagit lalu aku pechaya rayat enda sabar nganti penatai iya.

“Nya alai, pengawa ngatur program tu endang engkeman dikena ngintu Hari Gawai Dayak enggau Hari Raya Aidilfitri lalu tu peluang tuai besai datai ngaul rayat,” ku iya.

Iya ti mega penyanding penemu komiti pengatur ngarap program ngelalu pengabang nya lanchar.

“Aku ngarika semua komiti pengatur ngangau semua komuniti Pusa sampal datai ngerichahka program tu.

“Aku pechaya, mayuh pekara deka dikunsi Abang Johari bekaul status Sarawak dalam Perintah Penyerakup, tunga kuing pemansang Sarawak, ekonomi baru enggau penatai pemisi tambah.

“Pekara tu beguna amat ngambi kitai ba menua pesisir sedar senentang perambu Sarawak nuju nengeri maju manggai ba 2030.

“Ni nemu engka bisi ‘tepa’ ungkup kitai ditu,” ku iya.