Abas, intu meruan apai indai kitai – Korina Mang

MIRI: Bai ati kasih sereta sinuka nasit Janggu Ngalah, 69 taun, ti diau kediri nadai orang ngibun, raban ari Palan Servis Komuniti MP Miri ngasaika tanggungpengawa sida mutarka penanggul ditapi tudah tuai.

“Sinu amat meda pendiau aya Janggu tu, sebanaka diri nadai berau enggau nadai orang ngintu taja bisi tiga iku anak, pengudah bini iya midang,” ku Korina Mang, Pemesai Khas MP Miri rambau pejalai ngabas Janggu apin lama ke udah.

Nitih ku penerang, Janggu kala gawa nyadi polis budu ba sebuah serikat pemaju sebedau tu lalu badu gawa pengudah bini iya midang, tambah mega enda entu pengerai.

Penatai sida Korina berindik ari penerang dikerembai ba media rama ari siku indu ti nesau bala anak Janggu datai nyenguk apai sida di rumah iya di Tudan Phase 6 ditu.

“Penerang dibantai madahka Janggu ti sakit udah berapa hari enda makai ketegal nadai berau lalu mar begigaka bala anak iya ketegal nadai lumur telefon endur bepadah.

KASIH… Aya Janggu (tiga kiba) nerima penatai raban ari Opis Servis Komuniti MP Miri, ari kiba, Bolhan, Steve enggau Korina, di rumah iya di Tudan Phase 6 ditu.

“Pala Janggu mega bisi bakal bai iya labuh, enda dapat bejalai ketegal lemi tulang enda makai,” ku Korina ngelansa.

Berindik ari nya, Korina minta bala anak Janggu datai kia ngabas apai sida sereta nyaga enggau mela tudah ti sakit.

“Kitai patut ingatka jasa apai indai ti udah ngidup enggau ngibun kitai ari, anang sesekali nejuka apai indai idup merinsa, sakit nadai orang ngintu.

“Tu maya kitai malas pemanah enggau bebasaka apai indai,” tandu Korina.

Korina madahka sida deka ngemai penanggul ditapi aya Janggu tu ngagai Opis Pengintu Pengelantang Mensia Mayuh (JKM) minta bantu ti patut nentuka pengelantang iya dijamin.

Bela bisi nyempulang Korina, Sapit Ketuai Keadilan Pampang Miri Bolhan Salihi enggau Ketuai AMK Nengeri Sarawak Steve Teo Jia Jun sereta bala bukai.

Sida sebuat mega bisi nyuaka pemeri baka pemakai ngagai Janggu dikena ngelempungka tating penusah seraya nganti bantu bukai datai.

“Nitihka semaya kami sebuat, aya Janggu tu deka dibai ngelawa JKM kena Hari Satu tu, ngatur pengawa ti patut, nentuka pengelantang iya dijaga.

“Aku sekali agi minta bala anak Janggu tu datai kitu, ngabas enggau nyaga apai sida, sinuka tudah tuai nadai orang ngintu,” tandu Korina ti mega Ketuai Pemadah Indu Keadilan Nengeri Sarawak.