KUCHING: Perintah Sarawak ngelalu serikat Absen iya nya sebuah serikat pemansut skrin diot pemanchar penampak (LED) ti tebilang ba Huizhou, China ngerembaika makit sida ke Sarawak.
Sapit Premier Sarawak, Datuk Amar Awang Tengah Ali Hasan madah, serikat nya berengkah ditumbuh ba taun 2001 lalu ba taun 2014 dirintai ngembuan makit ba serata dunya baka Jipun, Rusia, Jerman, Amerika Syarikat, Hong Kong enggau ti bukai.
“Kitai temegah meda produk tu sereta ngelalu Absen nempa Sarawak nyadi palan dikena ngerembai makit produk sida ngagai menua luar.
“Kebuah pia laban Sarawak bepalan ba endur ti strategik sereta ngembuan peluang muntang tama ngagai makit Asia.
“Projek bepengulih tu seraris enggau Pelin Strategi Pemansang Pengudah COVID-19 2030 Perintah Sarawak ti bepelasar ke data enggau teknologi,” ku iya ba sebengkah penerang sehari tu.
Menteri Dagang Antarabansa, Industri enggau Beranakka Puku (MINTRED) nya diatu benung ba Huizhou begulai enggau raban ari Sarawak ngaga penemuai ngagai kilang panel LED.
