KUCHING: Kreatif ngaga video nyumai pemakai eksotik kelimpah makai begempuru enggau diri sebilik siti chanel youtube Abun Bilun majak mujur diatu udah bulih 21,000 subscriber (orang nitih).

Chanel tu dipenggi Abun Bilun, 24 taun ari Rumah Geoferry Badi, Nanga Tada, Kanowit madahka entara pemakai eksotik ti kala disumai iya baka ular, bayak, pama, ulat enggau ke bukai.

“Kelimpah ari nya, rempah ti dikena aku nyumai muntang dipelajar sida ti meda baka ngena bungai kechala, upa kechala, daun bungkang, enti ngelempis aku ngena daun buan, daun pisang lalu enti mansuh aku ngena ruas.

“Tiap video ti digaga aku ngena pelasar makai gempuru diri sebilik ke alai aku nyumai ke kami sebedau mai kaban belayan, bakih enggau kami sebilik makai,” ku iya lebuh dirandau Suara Sarawak, kemari.

Ku iya, pelasar makai begempuru diri sebilik tu nunjukka kaul rapit diri sebala ti dichunto ari adat asal bansa Iban.
Taja diau ba Johor Bahru, apai ngagai siku anak tu madahka pun iya nyadi youtuber endang ketegal rindu ati aja.

“Sebedau taun 2019 aku suah meda chanel youtube orang Indonesia, dia aku meda orang ti meda chanel sida datai beribu-ribu iku.

“Nya alai, lebuh gawa di Brazil ba bidang kapal aku nguji ngambi video palan ti manah-manah awakka ulih nyadi kenang maya ba menua orang.

“Enti aku engkah video nya ba facebook engka enda mayuh orang meda, nya alai aku engkah video ti diambi aku ba youtube,” ku iya.

Ari nya, ku Abun, orang ti meda video iya majak nambah lalu subscriber chanel iya mega majak mayuh.

“Lebuh pulai ari Brazil aku berengkah serius ngaga video awakka ulih dipeda orang bukai.

“Aku meda video nyumai enggau makai begempuru entara video ti pemadu mayuh dipeda orang, nya aku nguji ngaga mayuh agi video ngena pelasar tu,” ku iya.

Laban ti gawa ba kapal tauka bidang minyak enggau gis di Brazil, Abun madahka pengawa nyadi youtuber semida kereja nyambil aja.

“Aku diatu agi nganti proses visa tembu lalu deka pulai baru ke Brazil udah tu ila.

“Taja pia, diatu aku chakah ngaga video nyumai pemakai bansa Iban enggau Dayak laban aku deka pemakai bansa kitai tu enda punas tauka tinggal jeman lalu ulih diayanka ba serata dunya.

“Kelimpah ari nya, nembiak rebak baru ti nadai kala nemu manduk lauk kitai suba ulih belajar ari chanel youtube aku,” ku iya.

Ngelansa pasal pemar ti ditapi iya, Abun madahka ngatur bunyi enggau inggar nyadi penanggul ti besai ngagai iya lebuh ngaga video.

“Aku nangi nepu bunyi sengapa dalam video nanggika dikumbai orang niru.

“Kelimpah ari nya, lebuh deka ngaga video enda memukai bisi orang nebah lagu inggar, nya ke ngasuh aku sabar nganti sida badu,” ku iya.

Iya madahka, pengeliat ati chukup beguna dalam pengawa nyadi siku youtuber.

“Aku sabar sereta enda begaut deka nyadi popular laban suba aku semina nguji aja ngemasukka video dalam youtube.

“Belubah-lubah, minat aku nemu datai, nya ke ngasuh aku puh napi semua penguji.

“Pia mega, nyadi siku youtuber kitai mesti pandai enggau kreatif ngaga video awakka video nya meruan dikerindu orang ti meda,” ku iya.

Ku Abun, entara kenang manis sekumbang nyadi youtuber, iya berasai gaga lebuh meda sida sebilik ulih makai begempuru.

“Lebuh aku nyumai, anak enggau bini sereta bala bakih ulih makai berami seraya madahka pemakai ti dipanduk aku nyamai, ati aku chukup gaga.

“Taja pia, kenang pait aku kala ditiru orang ba video, suba udah video aku ayan, bisi orang bukai nyalin video nya, maya nya orang ti meda video aku majak tinggi.

“Berasai asa sereta rugi meh aku laban maya nya enda nemu utai ketegal agi baru, enggau ati berat aku madamka video nya,” ku iya.

Abun madahka, ba perambu ti deka datai iya deka pulai ke Sarawak sereta nemuai ngagai tiap iti bansa di menua tu ngambika ulih belajar pasal pengidup sida.

“Aku deka bemalam enggau sida kelimpah nyepi pemakai sida iya.

“Video nya ila deka dipasukka aku dalam chanel youtube aku empu awakka serata dunya ulih meda,” ku iya.