ACP Kaderi menggi pangku pengawa besai

KUCHING: Pasukan Gerakan Am (PGA) Batu Kawa nerima penatai Mandal Komander Briged Sarawak PGA ACP Kaderi Said ti baru dipadu gawa, tadi.

Komander Briged Sarawak PGA SAC Datuk Khaw Kok Chin madah, ari peneleba 41 taun udah mangku pengawa, iya andal amat ACP Kaderi deka nyadi pemesai ti tegap penemu sereta gawa belalauka atur.

“Aku ngarapka penatai ACP Kaderi ulih mantu ngangkatka nama PGA Sarawak pegari agi.

“Taja peneleba sereta penau gawa lebih 40 taun nya bebida tang iya ngepunka pengawa diri endang ba PGA,” ku Kok Chin.

Kok Chin bejaku munyi nya lebuh ngematka Pengawa Nyerah Pangku Pengawa Mandal Komander Briged Sarawak PGA entara Pemesai Pemerintah Batalion 11 PGA Supt Rosdi Inai ngagai ACP Kaderi Said di PGA Batu Kawa ditu tadi.

PANGKU PENGAWA BARU… Supt Rosdi Inai (kiba) nyerah pengawa ngagai ACP Kaderi Said (kanan) seraya dikemata SAC Datuk Khaw Kok Chin (tengah).

Ku iya, pekara kerejasama nadai nanggul ACP Kaderi enggau pemesai PGA ke bukai laban sida gawa beratka pengelikun menua.

Kelimpah ari nya, iya mega ngarapka bala pemesai bukai deka meri sukung enggau bantu ngagai ACP Kaderi dalam mangku pengawa nyadi Mandal Komander Briged Sarawak PGA ti baru.

Nangkan nya, ACP Kaderi madahka diri deka naka ulih bejalaika tanggungpengawa baru ti dilempai ba iya diatu.

“Bepegai ba tuju nyaga pengelikun menua, aku ngarapka sukung enggau kerejasama semua ngemujurka pengawa.

“Taja bisi ati nangi laban mayuh polis malut diri ba penanggul rama, tang aku andal amat sereta pechaya pangku pengawa nyadi polis patut dikemegah.

“Kebuah pia laban mayuh udah berita mantaika penyulut polis baka ngetan sida ti ngereja penyalah bejualka arak enggau kayu ramu nadai pemendar,” ku iya.

Iya mega madahka diri berasai lantang laban pulai ngagai palan asal, terubah iya gawa kenyau 1979 suba.

ACP Kaderi berengkah gawa di Batu Kawa lebuh diambi gawa nyadi polis ba Batalion 17 sebedau mindah ngagai Johor.

Udah nya, iya mindah ngagai pampang trafik tiga taun pengelama sebedau gawa nyadi pemesai CID di Miri, Kuching enggau Labuan.

Sebedau nyimpul jaku, iya arapka pengawa dikereja meruan mujur baka selama.

Sama datai pemesai briged enggau pemesai kanan PGA Batu Kawa.

Suara Sarawak