Adat Bungai Pinang Jadi Melaki Bini

MIRI: Raban bansa Dayak Murut ditemu etnik pemadu tuai diau mendam ba menua Sabah.

Penatai bansa tu dipelaba ari menua benama Annam, Indo-China enggau Pulau Pilipin lalu leka jaku Murut ba Sabah mai reti sida ti diau di entigis tauka tanah tinggi di menua ulu.

Ba Sarawak, bansa Murut tu etnik pemadu mit dalam bansa Orang Ulu lalu sida tebal agi diau ba rumah panjai sebelah tebing sungai.

Enti di Sabah, sida ngentapka diri ba pelilih Tenom, Pensiangan, Kemabong enggau Keningau kelimpah diau ngachir dataika menua Brunei Darussalam, Sarawak nyengkaum ba garis entara menua Kalimantan.

Bansa Murut mega dibagi ngagai etnik mit iya nya Murut Tahol tauka Tagol, Tidung, Timugon, Sembakung, Paluan, Bookan, Kalabakan enggau Murut Serundung.

BAJIK… Sida ke indu ngena ngepan asal bansa Murut Tagol.

Bepelasarka tipan jerita lama, peturun aki ini bansa Murut datai ari Lun Bawang lalu bukit digelar Bukit Murut di Sarawak nyadi kelai penatai bansa sida.

Pekara tu mega nyata dipeda ari gaya idup enggau pendiau gari sida digaga ari kulit kayu kelimpah enda betanchut sereta ngemeranka pengarap lama nyengkaum pechaya kayu, batu, sungai enggau bukit bisi semengat.

Sida nyembah sebarang utai ti dikumbai bisi semengat sereta tau ajih enggau kudus baka Bukit Antulai, Bukit Aru tauka Bukit Antu.

Bansa Murut pechaya Aki Kompuno bisi kuasa nengkebang semua utai ke bisi ba dunya tu enggau manang dikumbai Babalian ulih ngubat enggau nyumanka semua penyakit.

Taja sida diatu mayuh udah ngemeran pengarap baru, Kristian, tang agi ngintu Pengerami Kalimaran ti sebaka enggau Pengerami Kaamatan, diintu kelai tembu ngetau dereta dikena meri besai terima kasih laban Petara udah meri asil padi ke mayuh.

ADAT KELIA… tajau dikena maya adat ngintu pemati bansa Murut.

Adat Bungai Pinang Jadi Melaki Bini

Ba pengawa jadi melaki bini, sida ke indu enggau lelaki deka disabung jadi ari umur biak, 15 ngagai 18 taun lalu mengkang ngemeranka adat bungai pinang.

Adat tu ditampung ari aki ini menya lalu agi dikemeran nyentuk diatu baka baka adat melah pinang, adat pemati, adat Tina’uh’ enggau adat Bungai Pinang Jadi Melaki Bini.

Adat Bungai Pinang Jadi Melaki Bini tu antara adat ti suah dikena raban bansa Murut Tagang ti diau ba kandang menua ulu Sabah baka ba Pelilih Pensiangan, Keningau, Sepulut enggau Nabawan.

Barian tu nama diberi sida kelai bungai pinang pemeri ari sepiak lelaki ngagai sepiak indu maya hari nyadi.

Raban bansa Dusun enggau ke bukai ba Sabah madahka indu bansa Murut ngembuan bungai pinang ti mar dibida enggau etnik bukai ba Malaysia.

TAJAU… Tajau endur nepu bangkai.

Adat Bungai Pinang Jadi Melaki Bini tu diperati ari sukut pendiau bala lebuh sepiak indu dituntung penusah rabat, bisi kaban belayan melah pinang, ngulu pengerami bukai enggau Tinauh.

Sepiak lelaki patut nyaup sepiak indu baka meri keresa baka tajau, kain, emas, gong, kain nila, sistan, duit enggau ke bukai.

Maya nya, sepiak indu deka ngambi keresa tauka barang baka televisyen, peti ais, tajau, tawak, kain, emas, ensikal enggau barang berega bukai ari rumah sepiak lelaki lalu sida patut nurutka peminta bala ari indu kelai bebasaka entua.

Nambahka nya, antara barian dipinta apai indai indu iya nya dua kerebau, siti tajau bansa tilauan, siti tajau bansa minukul, siti tajau bansa belaying, siti tajau bansa manila, tawak enggau sebatang sumpit.

Sida deka ngatur pengerami melah pinang lima hari berunggu ke alai tiga hari ba rumah indu enggau dua hari ba rumah lelaki.

BETESAU… Tawak deka dipangkung kelai bisi penusah rabat ba genturung pendiau tauka rumah panjai bansa Murut.

Indu ti diterang deka nganta enggau ngerasuk ngepan dikumbai tambuloi, diasuh diau dulu ba bilik sereta disapat ngena kain ti mar rega.

Kandang tiga hari nya mega bala pengabang berami sereta dinahka pemakai enggau ngirup ai tuak ba rumah indu dikena ngerapitka tanggam kaul enggau pangan diri.

Pengudah tembu timpuh tiga hari, sida deka mulaika diri ngagai rumah lelaki disempulang pangkung egal tauka dikumbai kitai pangkung tawak ti meri jaku selamat jalai ngagai kaban belayan sepiak indu.

Berebak enggau nya, raban bansa Murut ngembuan penti pemali lebuh meri nama anak lebuh sida enda tau meri anak tekala nya laban nangika pekara ke enda manah nyadi lalu sida suah meri nama anak bekait pasal rampa menua tauka pekara ti nyadi.

Kenang silik tau dibacha ba lambar Ruai 4 enggau Ruai 5 pagila, 22 Ogos 2019.

NGETANKA KELAI BANSA… Bala nembiak bela ngerasuk ngepan asal sida maya ngintu pengerami besai.