Adat masa temuai

PULAU Kalimantan tauka tampak agi dikumbai Borneo ngembuan mayuh pesaka asal sekalika ari gaya pengidup, adat enggau main asal ngujungka iya suah ditapatka mensia ari serata dunya laban deka ngasaika peneleba gaya pengidup bansa asal tu.

Lebuh nemuai ngagai sebengkah menua tauka rumah panjai, peranak ke diau dia deka ngambat penatai kitai kelai pengaga nerima penatai bala temuai.

Genap chara tauka adat ngambat temuai nya bisi bida enggau nyelai nitihka gaya pengidup, pemisi enggau adat sida ba rumah panjai tauka genturung pendiau nya.

Serak tu, kitai deka ngelansa pasal adat menyadi kitai bansa Dayak ba Kalimantan ngambat penatai bala temuai lebuh ngusung tauka nemuai ngagai menua sida laban deka belajar enggau meretika gaya adat din.

Pemanah ambat peranak dia deka nyadi sebagi ari kenang manis enggau tanda pengingat ba pengidup kitai ngambika menua nya tampak dikelala manah amat ngelaluka bala temuai.

MURU SEMENGAT JAI… Ketuai Adat Bansa Dayak Ngaju deka nepas bala ketuai dipebasa ngena pandan dikena muru enggau ngesai semua semengat jai ba tubuh sida.

Tebal agi, bala temuai kelebih agi ari menua luar suah napatka kandang menua ti agi ngemeranka adat lama baka tu laban sida deka belajar enggau mereti silik agi sekeda adat ba Pulau Borneo.

Nya kebuah, kitai suah meda bansa bukai ngelawa menua tu laban sida ngasailka Pulau Borneo agi tubah ngemeranka adat lama taja dunya udah makin maju.

TUMPA KELAI BEBAKIH

Dayak Bahau ba pelilih Tering Lama deka meri tumpa ngagai temuai ti baru datai kelai sida udah bebakih enggau pengawa tu sebagi ari adat bansa nya ngambat bala temuai.

Udah nya, peranak dia deka sampal ngambat penatai temuai enggau besampi ngarapka sida gerai nyamai enggau lantang sereta gaga lebuh bejalai matau menua tauka diau ba rumah nya.

Lebuh besampi, sida ngarapka bala temuai deka selamat datai ba menua diri enggau ulih nusui pemanah budi basa sekumbang nemuai ngagai kandang menua nya.

Ketuai Bansa Dayak Bahau deka engkah duku ba atas pala, mulut enggau kaki bala temuai nandaka sida udah diterima datai kia.

NYAMAI… Kelimpah ditanchang ba urat akar, daun tubu tu mega suah nyadi biching enggau digulai ba lauk.

TEPAS PANDAN

Raban bansa Dayak Ngaju ba Kalimantan Tengah kelebih agi ba Kabupaten Kapuas ngasaika adat tepas pandan nya deka muru semengat jai ba tubuh siku-siku mensia lalu tepas pandan tu suah dipejalai lebuh ngambat temuai dipebasa tauka ketuai pemesai.

Adat tu udah dipejalai ari kelia lalu mengkang ditampung rebak diatu ngambika adat nya semampai meruan enggau semampai dipejalai kelai pengelain adat bansa Dayak Ngaju.

Nambahka nya, bala temuai ti datai kia diasuh mantap buluh ti melintang ba pintu penama ngena ilang, sebansa senyata khas bansa Dayak disempulang muzik enggau lagu ngena jaku sangian sepanjai adat nya dipejalai.

Jaku sangian tu dikena bejaku enggau semengat sebedau tama ngagai rumah lalu bala temuai enggau ketuai raban penemuai nya deka nanya baka sapa kita, nama, asal enggau kebuah datai ngagai pelilih tu.

Tanya baka tu sebagi ari chara bansa Dayak Ngaju nyeliahka penusah nyadi ngagai peranak dia tauka bala temuai ngambika sida semampai likun lebuh ba menua nya.

Udah nya, adat tu disempulang tanda asal bansa Dayak Ngaju enggau bisi pengawa genselan kelai bebasaka aki ini sida kelia.

DILINDUNG…. Tumpa dirasuk ba dekuan nandaka bala temuai diberekat lalu pejalai sida deka mujur magang.

IKAT TONGANG

Ba Pelilih Riam Panahan bisi bida adat lebuh ngelaluka penatai temuai kia ke alai sida deka bejalaika adat ikat tongang ngambi besampika pengelikun bala temuai semampai dilindung datai ba endur ti deka dilawa sida.

Tongang nya tumpa ti deka dipasuk ba jari kanan bala temuai enggau tumpa nya digaga ari urat kayu lalu ditanchang ngena daun tubu.

Ketuai Pelilih madahka urat kayu nya dikena nyilih urat engau daun tubu nya lalu sida deka besampika ngarapka pejalai bala temuai baka urat enda putus, kulit enda bakal.

Ku Kepala Pelilih, leka sampi tu mai reti bala temuai selamat datai ba endur dituju enggau pengawa sida semampai dilindung enggau mujur magang.

Lebuh bejalaika adat tongang tu, peranak dia deka nyendiaka guchi enggau tawak endur temuai duduk sebedau nanchang tongang ba jari sepiak kanan sida.

Udah nya, dua iku orang tuai adat deka besilih besampika pengelikun bala temuai ngena jaku asal bansa Dayak Ngaju nya.

Berau deka ditabur ba atas pala bala temuai enggau ngasuh sida ngetup kachip, udah nya baru nanchang tongang ba jari kanan sida.

Tembu pengawa nya tadi, sida diasuh ngirup tuak ti digaga tanda pengawa nya udah mujur lalu bala temuai udah dipesetuju enggau diberekat sepanjai pejalai.

Ketuai Adat ba Pelilih Riam Panahan madah, berau ba atas pala sida ti mai reti muai enggau nepas semengat jai lalu meri semengat.

Lebuh sida nabur berau ba atas tu sida deka nyebut jaku kur semengat ngambi semua semengat jai ti tau ngenataika penusah deka tekesai magang ari tubuh bala temuai awakka pejalai enggau pengawa sida mujur magang.

Nambahka nya, kacip ti diketup bala temuai tu tau ngasuh sida kering lebuh bejalai ngagai endur dituju enggau pengawa tu kelai bansa Dayak Ngaju sayau enggau kasihka bala temuai ti mulaika diri pengudah lama nemuai ngagai menua sida.

Berebak enggau nya, adat baka tu mengkang dikemeran menyadi kitai ba Kalimantan laban sida ngasaika adat baka tu kelai pengelain dikembuan genap bansa ba dunya kelebih agi matak bala temuai ngusung menua sida enda ngira ba Pulau Borneo tauka menua luar.

Nya alai, mensia mayuh kelebih agi rebak biak patut neladanka pengawa dikereja menyadi kitai ari menua sepiak nyin ngambi serata dunya nemu pengelain enggau pengeraja asal dikembuan bansa Dayak.

Pengawa baka tu patut ditunda enggau nyadi teladan ngagai semua kitai laban munyi ku sempama bejalai betungkatka adat, tinduk bepanggalka pengingat, dikelala daun ari kayu, dikelala buah ari langgu, dikelala bansa ari jaku, dikelala ulah ari penau, dikelala basa ari penyiru.

Sempama nya meri besai reti ngambi kitai semampai bebasa enggau ngambat temuai enggau penuh pengaga ngambika bansa kitai dikelala kemerah sereta mentas enggau temuai kelimpah matak mayuh agi temuai ngelawa menua kitai tu.

Suara Sarawak