Adat ngaga pending lanjut nyau jarang dikemeran

500 GRAM! Nya mih pemerat sumpin temaga ke suah dikena orang indu raban bansa Orang Ulu ba kandang menua utara Bumi Kenyalang dikena ngasuh pending sida lanjut.

Pia mega, pending ti lanjut nya dikumbai aset berega bala indu ari entik nya dikena nguntik tauka narit ati orang lelaki ngambi jadi enggau sida taja chara tu diperagam baka ke enda manah.

Ba komuniti Orang Ulu, pending ti lanjut nya ngayanka pemajik bala indu kelimpah agi ngemeranka adat asal.
Adat

Tang seriris enggau pemansang dunya, adat nya majak ditinggalka rebak baru laban enda rinduka adat baka nya sereta milih chara ke engkeman nitihka gaya diatu ngambi dipeda bajik.

Taja pia, chara ngias diri dikumbai sumpin sing suah dikena orang tuai ngujungka adat pending lanjut majak dikelaung lalu diteju pia aja.

KELAI PEMAJIK DIRI… Pending ti lanjut nya aset indu Orang Ulu dikena nguntik sida ke lelaki.

Pekara ti balat ngirauka ati lebuh bisi sekeda nembiak Orang Ulu malu ngemeranka adat nya laban ngumbai diri nyelai ari orang bukai lebuh pending lanjut.

Anthonia Abong Anyi asal ari Ulu Baram, ngembuan pending lanjut madahka aset berega nya ngemegah nama iya empu sereta ngasaika diri bajik sereta nyelai.

“Ukai mudah ngembuan pending ti lanjut laban begunaka awak ke lama sereta pedis ngaga pending baka tu.

“Tang aku berasai lantang pengudah pending udah lanjut dataika tikas bahu.

“Tu mih pekara ke patut dikemegah bala indu kami (Orang Ulu) laban ngembuan pending ti lanjut.

“Pendiau orang indu ti agi ngemeranka adat pending lanjut tu patut dikemegah sereta dipuji ngambika rebak dudi ngelala adat asal peturun bansa Orang Ulu,” ku iya.

Ku Abong, pengawa ngena antin berat enggau pending ti lanjut ukai semina dikemeran raban indu Orang Ulu aja tang bisi mega dikembuan sida ke lelaki.

GAYA Sumpin… Indu Orang Ulu suah bekenaka mayuh bansa sumpin sereta manah enggau perenching dipeda baka emas.

Sumpin temaga

“Nitihka adat, apai indai berengkah nebuk pending enggau ngelekatka antin berat kenyau nembiak agi mit sekalika sumpin nya digaga ari temaga tauka besi bukai.

“Berat sumpin baru deka ditambah belama ngambi ngasuh pending majak lanjut dataika tikas bahu ngagai sida ke bekenaka sumpin nya.

“Sumpin tu deka dikena maya siang hari lalu deka ditanggal lebuh malam hari.

“Tebal agi, sida deka bekenaka temaga laban manah dipeda enggau perenching bala emas. Saiz enggau gaya antin nya ditempa ari mayuh bansa chura enggau utai lama sekalika segala enggau gaya bukai baka tumpa, segala enggau petul,” terang iya silik.

Abong madah, indu Orang Ulu deka dipeda makin bajik enti pending sida majak lanjut.
Taja adat nebuk enggau ngasuh pending lanjut enda agi dikemeran rebak diatu tang pesaka asal nya enda patut diteju pia aja.

“Pengawa ngasuh pending lanjut ukai pekara ke muntang dikereja kelimpah lama dikereja dataika betaun ngambika pending kitai dipeda lanjut nitihka kedeka ati.

“Pengawa tu ukai sehari dua tang betaun ngasaika pemedis kulu kili ngena antin ti chukup berat manggai 500 gram laban kitai ukai semina ngereja semua tu ketegal deka bajik tang deka nyaga pesaka asal bansa kitai tu.

Nangkan nya menyadi iya, Ulawan Anyi madahka diri berasai asa meda ulah bala nembiak ari etnik nya laban enggai ngemeranka adat pending panjai sereta madahka gaya nya enda nitihka gaya pemansang kemaya hari.
Sapa agi dikearap?

“Tu mih adat enggau gaya pengidup kitai. Enti sida enda ngemeranka pengawa tu, sapa agi dikearap nyaga adat ngambi dipeda rebak dudi lebuh kitai udah midang laban pesaka tu deka lenyau diserunyut arus pemansang dunya.
Sandra Akiem ke udah lama ngidupka diri ba Miri madah, nadai mayuh agi indu Orang Ulu sekalika bansa Kayan, Penan tauka Kelabit agi ngena sumpin lama tu.

“Enti suba, sumpin tu suah dikena maya bisi pengerami besai baka Pengerami Gawai Dayak, Krismas enggau pengerami bukai ba rumah panjai.

“Enti ngagai pasar, kami jarang ngena sumpin laban irauka tu diruntun orang sereta suah amat nyadi kes sumpin lama indu Orang Ulu diruntun ketegal dikumbai antin emas.

“Nya kebuah, jarang kitai meda indu Orang Ulu ngena sumpin nya ba mengeri tang suah dikena ba rumah panjai,” ku iya seraya madahka semina indu Orang Ulu ke agi ngemeran adat tu tang indu Iban enda bekenaka sumpin baka nya.

Naka tu, semina beratus iku aja orang tuai raban bansa Orang Ulu kelebih agi ba kandang menua Utara Sarawak ti agi nyimpan pending ti panjai laban deka ngetanka adat lama bansa nya.

Nambahka nya, Gerempung Orang Ulu Sarawak (OUNA) enda nulak pekara bekaul adat tu deka lenyau lebuh orang tuai ke diatu udah nadai ketegal rebak baru ke ngenggaika adat baka tu.

Nya alai, gerempung nya dekaka perintah enggau piak bekaul ngempung penerang silik ngambi ngerikod adat nya awakka enda lenyau ngapa ketegal ubah pemansang kemaya hari.

Suara Sarawak