Adat Nguai kelai basa kitai

NYERUMBA hari besai enggau kemisi panjai ujung taun tentu mayuh entara kitai ngena peluang tu ngatur pengerami melah pinang.

Enti disebutka pengerami melah pinang, tentu mega kitai deka bekenangka reti adat nguai tauka ngugi.

Tuai Rumah Akul Dagang madah, mayuh kitai diatu enda ngira sekalika apai indai tauka bala anak ke agi bujang dara bisi penangi enggau nguai ke ruang bilik orang bukai.

“Dalam bulan Julai taun tu tadi, aku kala mai kitai bekenangka Adat Nguai enda tau dilengka laban nadai utai dulu ditanya orang lebuh bisi penusah nuntung kelebih agi penusah pemati.

“Kitai mega nemu, ketegal Adat Nguai tu mega suah ngasuh pengawa orang deka jadi melaki bini puntan laban sama bela enggai alah dibatak nguai ke pangan diri,” ku iya muka randau enggau Suara Sarawak.

MERI LALAU… Tuai Rumah Akul Dagang

Ku Tuai Rumah Akul ari Sungai Belalang, Salim di Sibu, pekara tu suah bepun ari penemu apai indai baikka nya ari sepiak indu tauka lelaki, kelebih agi enti anak bela ngasika jaku apai indai sida.

Mayuh amat udah dipeda mata lebuh ngatur tauka berandau pasal pengawa nguai tu, apai indai indu tauka lelaki bela kering penemu sereta enggai alah sama deka bebatak ke anak tauka menantu nama bilik sida.

“Ulah bela kering penemu baka tu tau ngujungka pengawa berandau tadi enda ulih putus tekala nya lalu bisi sekeda puntan baka menasan jalai jelu.

“Mayuh orang salah runding reti ke bendar Adat Nguai tu laban ba peragam enggau penemu sida enti udah nguai enggau nama bilik entua, sida terus ninggalka apai indai enggau ninggalka bilik tuai.

“Sida mega ngumbai diri enda disagi ngundang bilik asal, badu nyenguk enggau ngabas apai indai tang semina ngerengkunka bilik penaik entua.

DIEMBING… Menantu ke baru datai ba bilik penaik kitai patut diajar ngereja pengawa lalu ukai diteju enda nemu utai.

“Nya alai, penemu enggau runding baka tu agi balat nekul tauka nanggul ti tau ngasuh kitai siku-siku bisi ati nanggi enggau takut deka nguai,” ku iya nampung randau.

Ke bendar ku iya, reti Adat Nguai tauka sekeda menua nyebut ngugi iya nya tua namaka diri ngagai bilik bini tauka laki diri empu tauka puntang agi disebut kitai nyemilik entua.

Taja udah sebilik enggau entua, ukai reti tua muai apai indai enggau bala menyadi sendi sereta kaban belayan diri sereta muai bilik lama enggau menua asal.

“Ukai mega reti tua nguai ke bilik bini tau laki diri badu agi ulih nyenguk enggau ngundang apai indai ke tinggal sereta meri seduai belanja. Semua penemu baka tu endang salah.

“Tua ke udah nguai ke bilik orang agi ulih nemuai ngagai apai indai semalam dua sereta agi ulih melanja seduai tang enda tau enda adil, nadai bepinang benibung, ngambika sama bela nyaga ati apai indai diri empu sereta entua tua,” terang iya silik.

Ngena awak serak tu, Tuai Rumah Akul bisi nibarka jaku lalau nuju sida ke bisi nerima penatai menantu enggau ipar ke nemuai ngagai bilik sida, ti tau nyadika malin dikena nyaga ati kelimpah ngayanka basa ngagai temuai.

“Tua ti nyadi entua anang bangat beambi ulih meda menantu ka nguai ke bilik nuan. Nuan meseti nemu nyaga ati menantu laban iya udah sanggup namaka diri ke bilik tua.

“Nuan mega meseti ingat, ukai nyamai tudah tuai nyingkang ke kaki ari bilik diri empu ninggalka apai indai enggau menyadi sendi bukai, kaban belayan ti enggau iya beridup ngelama tu.

“Enti sema iya agi bedau nemu reti utai, apin nemu ngereja pengawa nitihka tua, tau ajar sereta padah manah-manah. Atur ni bagi pengawa ulih dikereja tudah ngambika iya ulih belajar nitihka singkang tua.

“Anang meda iya ke lunga-lunga enda nemu pengawa tu nya lalu abis sebelah ruai sebelah orang endur tua betusika pengurang tudah. Asai ba tubuh tua empu enti baru tama ke bilik orang sigi agi bisi ati rawan, ati malu.

“Tua ke entua tu mih nyadi apai indai ti ngajar menantu laban iya udah namaka diri ba bilik kitai. Intu mih enggau manah anang bechiping, bebagi ati ngambika iya tau diau lantang sereta ngasaika pengidup ti meruan ba bilik tua.

“Tambah mega, menantu endang dikearap betah nyemilik kitai, baka iya ngasaika pementas apai indai diri empu,” ku Tuai Rumah Akul madah nyemetak.

Kelimpah ari entua, menantu mega patut nemu lebas pengawa enggau reti tanggungpengawa enti udah nguai ngagai bilik laki, anang mang tulang enti entua ngasuh sereta ngasika ajar bala entua bilik sepiak enggau ipar tuai.

Ku iya, tua ti nyadi menantu meseti ngubah perangai serrta ulah diri laban tua udah diau ba bilik orang ukai sama baka diau ba bilik diri empu, tau nyikap diri tumu ba pengawa bebela enggau ngintu ruang bilik ngagai sida ke indu.

“Sida ke lelaki tau matih diri ngambi teleba enggau nemu ngereja pengawa ba tanah enti disema dibai entua nurun ngereja. Reti iya, disiplin enggau ulah ti likun enda tau enda diterenak, ukai semina maya nama bilik entua, tang dikemeran ari bilik diri empu dulu.

“Enti suba tua ba bilik diri dani pukul 9 pukul 10, tang diatu udah ba bilik entua enda patut agi dani nitihka jam nya. Tua ba bilik orang ka pan enda nitihka orang mih dani pukul 6 pukul 7, laban tua udah beruang bilik lalu udah bisi tanggungpengawa.

“Ngagai menantu laki, enti tua meda entua bepasukka gari kereja tau tanya tau sapa, anang tua telunga-lunga. Tanya ka kini ke nuan apai tauka indai, ulih aku enggau. Kitai mega regas dipeda entua.

“Ngagai menantu indu, berubah meh tua laban enda sebaka ba bilik tua empu. Nama udah berengkah manuk engkukuk alu dani tua berapi besumai ke ai besumai ke asi engka laki tauka entua tua deka bekerja tauka bejalai ke kebun tauka umai.

“Besaup meh tua sama bela ngereja enggau entua bekemas ka rumah bebasu pinggai mangkuk. Entua sigi madah awakka dia endu lagi aku masu ia, tang tua meseti nemu reti, malu enti ngelakka entua ngintu utai,” ku iya ngelalau.

Nangkan nya ku iya, ipar ari sepiak indu enggau lelaki mega patut nyaga ulah enggau basa sida ngagai orang ke baru nampil bilik penaik.

Ambika chunto, kitai ke ipar anang bangat deka ngulun baka tua ke ngaga menyadi diri laban meda orang ke ka ngereja pengawa alu diulun ke tua penapat.

“Anang mega sepeneka ngasuh orang, ukai baka tua ngasuh menyadi diri. Tau berunding ga tua, sekali dua engka agi tua ulih ngasuh tang enti ke suah engka lain gak asai iya ke ngempu tubuh.

“Nyamai pan tua ngasuh ipar tua ngereja pengawa enda meh kitai nyamai ati ngasuh tudah belama-lama, nyau baka kitai enda bebasaka tudah ke baru nyemilik.

“Nitihka pematut, tua begulai enggau ipar anang ngaga iya baka orang datai, gaga baka tua begulai diri menyadi, ngambi ke ati iya nyamai asai ke begulai enggau diri sebilik. Keingat mega, ukai nyamai tudah nama lalu nyelat kediri ke bilik kitai,” ku Tuai Rumah Akul nyimpul kenang.

Suara Sarawak