SUKU raban bansa Melanau ti nguan Bagi Menua Mukah ke bepengarap Kristian enggau pagan agi ngemeran enggau siruka adat lama ke udah ditali kenyau ari kelia nyentuk diatu.
Nadai ngira jalai pengarap, komuniti Melanau kelebih agi ba genturung pendiau ba Tellian, Jebungan, Sesok, Tegak, Petanak enggau Penakub Ulu ti bepengarap Kristian enggau Pagan mengkang ngereja Adat ‘Petetug’ tauka dikumbai ‘Pu’uk’ kelai lepas pantang rumah pengudah penusah rabat.
Adat ‘Petetug’ tauka ‘Pu’uk’ suah diatur pengudah tujuh hari niang dikubur tang nya ukai sebagi ari pengawa ke mesti diatur komuniti ditu.
Adat tu tau diatur tauka enda ibuh diatur laban nya bepanggai ngagai sempekat tauka penemu begulai.
Semina diri sebilik ti ditinggang penusah rabat aja ulih ngaga pemutus sekalika adat tu mesti diatur tauka enda.
Kebuah pia laban adat tu begunaka besai belanja sereta saup ari kaban belayan enggau mensia mayuh.
Enti adat petetug tu dikereja, dia kitai meda semua pengawa ti udah diperambu enggau disetuju deka dikereja begulai nengah chara beripai.
Nya kebuah, pengawa tu begunaka saup ari bala bukai ngambi pengawa lempung enggau lanchar agi.
Tusun pengawa Adat Petetug
Enti Adat Petetug tu deka diatur, peranak dia deka nurun ke kampung ngiga daun ‘isang’ enggau dan mulung nyadika lidi.
Sida ti ngereja pengawa ba rumah orang dituntung penusah rabat nya tadi deka ngiga pemakai ti diguna ungkup Adat Petetug tu.
Entara pemakai diguna iya nya berau pulut, nyiur tuai enggau nyendiaka pemakai asal bansa Melanau baka penganan iri, perut manuk, penyaram enggau baulu ungkup Hari Petetug ila.
Ba hari keterubah, Adat Petetug tu deka dipunka enggau pengawa manduk berau pulut nitihka berau pulut disediaka rumah nya enggau pemeri bala bukai.
Berau pulut nya dipanduk pengudah digulai enggau santan nyiur, garam enggau gula.
Pengudah dipanduk, berau pulut nya tadi dibagi ngagai bala bukai ngambi ditungkus enggau daun isang sereta lidi dan pun mulung.
Pengawa nungkus berau pulut ngena daun isang enggau lidi tu tadi digelar ‘Mu’uok’.
Pengudah tembu ditungkus, baru berau pulut ke udah ditungkus nya tadi lalu dikukus.
Nambahka nya, pengawa mela pemakai ba dapur tu endang dikereja sida ke indu.
Pengudah tembu nungkus asi pulut besantan tu, baru ngepunka pengawa nutuk berau pulut ti udah direndam beberapa jam ngena dulang enggau lesung tauka dikumbai sesug sereta nyiur parut.
Nya kebuah, pengawa nutuk berau pulut tu tadi dikumbai ‘Petetug’ ba jaku bansa Melanau.
MU’UOK
Pengudah nutuk berau pulut digulai nyiur parut, baru berau nya tadi dikukus baru dalam periuk ke besai agi.
Nyadi, orang Melanau ngela berau pulut ti ditungkus gulai santan nya ‘Bekukus’ lalu berau pulut ti ditutuk gulai nyiur parut nya dikumbai ‘Tetuhun’.
Pengudah tembu pengawa ‘Petetug’ enggau ‘Pu’uok’, sida ke udah besaup mela pemakai tau mai pulai ‘Bekukus’ enggau Tetuhun nyema pemakai nya bisi laluh.
Pengudah tembu pengawa nya, hari siti sida ke ditinggang penusah rabat deka ngangauka mensia mayuh baru ngambi nyaup ngereja pengawa.
Entara pengawa tu iya nya muka kimis, meresi periuk ke udah dipinjau sepanjai penusah rabat nyentuk lepas pantang rumah ngambi dipulaika baru.
Ba hari kepenudi, sida deka ngatur pengawa besembiang kelai lepas pantang rumah.
