Adat sereta lalau ari Panglima Dayak

Baru lima hari kitai bansa udah ngerami Gawai Dayak lalu penyelai pengerami Gawai serak tu nyata bebida ari selama.

Kati enda munyi nya laban tebal agi bala kitai ke mayuh gawa di mengeri tentu mayuh andal deka pulai ngagai menua beserimbai enggau Gawai Dayak tang semua nya taun tu puntan ketegal nitihka Atur Tagang Pejalai Bersyarat (PKPB) sereta nyeliahka pengerekai pandemik Covid-19.

Enti enda ketegal Covid-19, maya tu jalai raya Pan Borneo ari utara nyentuk ke selatan nengeri tu nyangka agi dedat tauka bekebesut laban entukar mensia ti mulaika diri ngagai endur gawa.

Nadai ku enggau, anggap Gawai taun tu tadi nyadi siti leman pengingat sinu ba pengidup iku kitai tang pekara ke pemadu beguna nuan enggau aku agi meruan gerai baka selama.

Arapka semua kitai terus kering ati ngelaban penguji, terus bejejaga dikena nyeliahka igi penyakit ke agi bisi nyadi ba mayuh menua di dunya tu nyengkaum di menua kitai ditu.

Naka kemari (4 June), lapan hari bejurut Sarawak beresi tauka nadai sebarang kes positif Covid-19 dirikod. Nya alai, terus titihka Atur Pengawa Standard (SOP) ke udah dilangkar perintah awakka nyaup mutuska rantai penyakit tu sereta nentuka menua ulih menang ngelaban Covid-19 ti disempama baka munsuh ti enda dipeda.

Di menua Pontianak, Kalimatan Barat menyadi kitai bansa Dayak dedin sida bisi ngatur ‘Adat Balala’ dikena nyaga diri kena rampit penyakit Covid-19.

Ku penerang siku ‘Pangalangok’ (ketuai) Dayak di menua nya, Panglima Jilah iya madahka naka tu Puji Tuhan (kur semengat) empai bisi raban Dayak ari genturung pendiau ke dijaga iya bebadi nyawa ketegal Covid-19.

Ku iya sida meruan ngemeranka adat lama ke dikumbai Adat Balala (ngampun) tauka penulak tulah dikena nagang penusah besai nyadi (pengerekai Covid-19). Adat Balala tu iya nya pengawa miring ngambika ulih nulak kuasa pemetang (ti nyeruga nyadi igi penyakit Covid-19).

“Kitai ngampun ngagai petara ngambika iya seruran nyaga, ninga sampi sereta ngiarka kitai ari penyakit ke ulih nganu nyawa. Nya alai, anang kelalu irau angap penyakit ke benung ngerekai nya siti tangkan ari Petara bekaul enggau ulah mensia di dunya,” ku iya nengah sebengkah laman Youtube diberi nama ‘Pesan Ti Besai Reti Ari Siku Panglima Besai Bansa Dayak- Panglima Jilah’.

Iya mega ngelalau mensia mayuh awakka anang kelalu takutka Covid-19 ngujungka kitai nyau kelalu nangi nurun gawa sampaika nadai utai dikena nupi diri sebilik.

“Igi penyakit nya enti majak disenakut iya deka majak nyadi. Nya alai, pejalaika pengawa baka selama taja pia kitai tetap bejejaga enggau penatai sebarang orang ke enda dikelala,” ku iya.

Berebak enggau nya Panglima Jilah bisi ngelalau pasal pemesai reti ulah meseti beradat enggau semua orang. Anang sampai kena anu petara enti kitai idup enda beradat. Ulah orang enda beradat tau ngasuh mensia charut.

“Adat mega enda tau disalah guna laban adat dikena ngemetulka pendiau mensia. Adat ukai dikena ngemba orang bukai. Tang adat dikena ngajar mensia, nyema orang nya ngelanggar adat iya sigi patut diukum nitihka adat.

“Semua kitai idup di dunya bela bisi adat, titih aja atur ke digaga ambika banding dalam sesebengkah menua kitai patut nitihka adat tauka undang-undang ke udah ditempa bala pemerintah. Pia mega ba ba sentang adat lama kitai patut nampung iya laban nya mandangka identiti kitai,” ku iya.

Ungkup penemu Panglima Jilah siku ketuai ti ngiring siti raban dikumbai ‘Pasukan Merah’ Dayak ke ditumbuh dalam taun 1995 di Pontianak.

Panglima Jilah mega mesan sentang idup ba dunya tu anang sesekali semina dipeda bisi pengarap tang ‘mati’ adat. Ku iya, kitai mensia ada ke dunya tu endang ditempa ari siku Petara nya kebuah kitai patut meri terima kasih ngagai Petara.

“Anang malu ngaku penatai asal diri. Anang ngakim pendiau orang. Anang ngelabuhka pangan diri. Sebedau ngereja sesebengkah utai patut dikereja enggau niat tauka ati ti lurus,”ku iya.

Tandu iya, ngelansa pasal pengawa nyadi panglima. Sida ke diangkat nyadi panglima ukai orang sengapa laban pengawa tu chukup berat nyaga menua enggau mensia. Sida tu kebendar digelar nyadi panglima ketegal dua pekara.

Kesatu iya endang bisi darah peturun panglima tauka ari ada endang udah digelar panglima. Udah nya kedua diangkat ari luar. Reti nya enti orang nya amat bisi pengelebih enda salah diangkat nyadi panglima.

“Taja pia orang ke digelar panglima enda ibuh kelalu ngeningi diri, sida tu patut ngembuan daya idup (budaya) enggau adat ke tinggi kelimpah ulih nyadi pelindung enggau teladan ngagai semua orang.

“Ambika banding enti kitai enda ulih nyadi matahari chukup mih nyadi (lampu) kelita. Bela nyadi penampak ngagai semua orang abis nadai ngagai bala menyadi enggau diri sebilik.

“Panglima enda ibuh kelalu lawa minta disenakutka orang. Tang kereja mih pengawa enggau sepenuh ati, kereja utai ke manah. Giga pengidup ti bepengelantang. Cheremin dulu pendiau diri, ati meseti lantang, tunjukka ulah ti menuku ngambika sebarang aja utai dikereja deka teulihka pemujur, ku munyi lalau sereta sampi Panglima Jilah.

Suara Sarawak