KUCHING: Perais mata duit RM10,000 mujur dipenggi Adruce Azman pengudah mujur bulih gelar champion Tok! Buskers Challenge 2023.
Ba pekit ti diatur ba Auditorium P.Ramlee RTM Kuching, 1 Julai tu tadi, pemekit solo nya mai pulai trofi, setipikit sereta sebuah gitar dipelanja Yamaha Music School Kuching.
Perais nya udah disuaka Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah ti datai meda pemerindang ari bala pemekit malam nya.
Mun-Kids Buskers bulih lumur dua lalu mujur ngempu mata duit RM7,000 seraya lumur dua dipenggi KJ Buskers ti nerima perais RM5,000.
Perais sagu ati udah diberi ngagai 3 Jejaka Sopan; Senggalang Buskers enggau Adi Buskers penyampau RM3,000.
Ba lansa sama, bala pemenang bukai enggau penerima sagu ati mega diberi trofi enggau setipikit.
Bala penyereta Kemuncak Tok! Buskers Challenge 2023 nya udah nyadaka dua buah lagu iya nya lagu Melayu enggau lagu etnik bukai sereta diperansang nyadaka lagu ditengkebang sida empu.
Kelimpah ari nya, mensia mayuh mega diperindang penanyi tebilang menua baka Zee Avi, Radhi OAG, Bob (Sentuhan Buskers) enggau Knowno Hornbill.
Ungkup rikod, program Tok! Buskers Challenge 2023 keterubah diatur Opis Broadcasting Nengeri Sarawak enggau kerejasama Perintah Sarawak nengah Opis Menteri Dagang Temuai, Industri Kreatif enggau Seni Pemerindang.
Berebak enggau nya, perintah enggau opis menteri mega nyukung penuh program tu temegah meda inisiatif RTM Sarawak ngerichah enggau negapka industri muzik Sarawak.
Nya nyengkaum busking nyadi sebagi ari Gig Economy iya nya kereja nitihka kunterik timpuh pandak tauka dikereja chara ‘freelance’ ba menua tu.
Nya mega nyengkaum ngerembaika pengulih program tu ngagai renggat ke tinggi agi baka Pengerami enggau Aum Besai Muzik Jalai Antarabansa ti ngempung buskers ari serata dunya ngambi bekunsi peneleba enggau penau ngerichahka agi industri muzik ba Sarawak.
Kelimpah nyendiaka pelasar ngagai bakat tebilang ba seni pemerindang belagu enggau seni bemain kereban muzik ngena konsep busking, program tu mega entara inisiatif RTM Sarawak ngangkatka industri kreatif sereta seni pemerindang ba menua tu nipakka juluk opis menteri.
Program baka Tok! Buskers Challenge 2023 tu mega dipeda chukup semak enggau mensia mayuh laban konsep busking tu udah disukung mensia mayuh kelebih agi ba menua tu.
