Adun Machan enda tinggal betuchuk vaksin Covid-19

KANOWIT: Kaban Kunsil Nengeri (Adun) Machan Allan Siden Gramong, siku ari pengari rayat ti enda tinggal betuchuk vaksin Covid-19.

Iya nengah Facebook PBB N. 50 Machan sehari tu, bela nesau mensia mayuh patut ngerejister nama bela ngambi tuchuk vaksin nya.

“Ngarapka semua kitai belabuh ari diatu ngerejister nama diri ngambi vaksin tu.

“Enda ngira tuai biak anang enda ngambi vaksin tu dikena kitai besaup enggau pangan diri ngemunaska pengelekai Covid19,” pia ku tangkan iya.

Allan mega madah, pengawa ngerejister nama nya tau digaga nengah aplikaysen MySejahtera.

“Kelimpah ari nya, kita mega tau ngelawa klinik pengerai perintah ke besemak,” ku tandu iya.

Kepala Menteri Sarawak, Datuk Patinggi Abang Abdul Rahman Zohari Tun Datuk Abang Openg nyadi pemesai keterubah di nengeri tu ngambi tuchuk vaksin nya, kena 26 Februari tu tadi.

Kelimpah pemesai enggau pengari rayat perintah Gabungan Parti Sarawak (GPS), pengari rayat ari penyakal mega bisi nerima vaksin nya.

Vaksin keterubah datai di Sarawak enggau penyampau 23,400 dos kena 24 Februari sebedau renggat kedua iya nya 31,590 dos kena Hari Tiga tu tadi.

Suara Sarawak