Agih belanja dikena meli vaksin tambah udah disedia

BAU: Kepala Menteri Datuk Patinggi Abang Johari Tun Openg udah ngagihka belanja dikena meli vaksin Covid-19 ungkup rayat Sarawak enti sema bekal vaksin nya bisi penanggul ila.

Chairman Komiti Penyangga Penusah Nengeri (JPBN), Datuk Amar Douglas Uggah Embas madahka Sarawak andal ulih nyadung vaksin Covid-19 ngagai dua juta iku peranak nyentuk bulan Ogos tu.

“Kami mega udah madah ngagai menteri ba Kuala Lumpur pasal juluk deka nembuka program betuchuk vaksin tu nyentuk bulan Ogos.

“Taja pia, perambu enggau juluk nya bepanggai ngagai bekal vaksin ti diterima kitai ari Kuala Lumpur,” ku Uggah nerang.

Uggah mansutka jaku nya ngagai pemberita pengudah ngabas Bilik Operasyen Atur Mindah Betagang Belebas (PKPB) ba Kampung Tringgus, ditu kemari.

MENDINGKA PENERANG… Uggah mendingka penerang pasal status Covid-19 di Kampung Tringgus, Bau ditu kemari.

Sama nyempulang pejalai Uggah iya nya Adun Serembu Miro Simuh enggau Sapit Sekretari Nengeri Datuk Ik Pahon ti mendingka penerang ari pegawai Dr. Winnie Johnnie.

Uggah ti mega Sapit Kepala Menteri madahka dikena nyapai tagit nya, Kepala Menteri udah ngagihka belanja dikena meli vaksin enti sema bekal vaksin deka nyadi penanggul.

“Berebak enggau nya, JPBN benung merambu lalu berandau enggau Raban Penyanding Penemu Program Betuchuk Vaksin Menua pasal pekara nya.
“Raban nya betuaika Datu Dr. Andrew Kiyu ari Unimas benung berandau enggau raban pakar di Kuala Lumpur sentang penerang vaksin nya.

“Nambahka nya, sida deka nerangka pengasi enggau pemanah vaksin nya,” terang iya.

Uggah nyemetak madahka JPBN dekaka pakar bejalaika pangku pengawa dibanding kaban politik.

Bekaul program betuchuk vaksin ungkup Pelilih Bau, Uggah madahka lebih ari 20,000 (40 peratus) peranak dia udah rejister deka betuchuk vaksin.

“Kami mega ngarapka bala bukai ti apin rejister, dipinta rejister diatu.

“kebuah pia laban kami enggaika siku rayat Sarawak kena tinggal ari betuchuk vaksin,” ku iya nerang.

Ngelansa pasal Atur Mindah Betagang Belebas (PKPB) ba Kampung Tringgus, Uggah madahka 760 iku peranak ari 186 ruang bilik ba tiga buah genturung pendiau udah bepekul.

PKPB ba genturung pendiau nya berengkah dipejalai kena 8 March tu tadi pengudah ngerikod 54 kes positif Covid-19.

Nangkan nya, Uggah berasai lantang ati enggau perambu ti dipejalai raban bekuasa.

“Nyadi pengari rayat, aku meretika penyiru enggau pemanah Miro betatika utai diguna rayat ngambi pengelantang kita ditu semampai dijaga.

“Tang, PKPB tu mesti dipejalai ngambi nyaga pengerai kita lalu ukai deka ngenataika penusah.

“Ba Kampung Tringgus, kami ngemendarka peranak ditu nurun ngetau padi tang mesti nitihka Atur Pengawa Standard (SOP) ti udah ditetapka.

“Kami enggaika sida kena rampit tauka ngerampit igi penyakit nya ngagai orang bukai.

“Kami udah nemu igi penyakit tu balat ngerekai lalu kitai mesti bekerejasama ngambi nagang enggau nentuka igi penyakit Covid-19 tu pukas,” ku Uggah.

Suara Sarawak