Agih belanja ditiki ngagai RM5 bilion ungkup Program Betuchuk Vaksin Covid-19 Nasional

SARATOK: Program Betuchuk Vaksin Covid-19 Nasional sebagi ari pekara diselinting Perintah Besai nengah Program Strategik Ngenegapka Rayat enggau Ekonomi (Pemerkasa).

Sapit Menteri Pengeluar Kuasa enggau Pengeraja Asal, Datuk Ali Biju madah, perintah endang naka ulih nagang pandemik ari majak ngerekai enggau ngeruga ekonomi menua.

Ku iya, program betuchuk vaksin nadai bebayar dikena nyaga pengerai mensia mayuh nya entara inisiatif dipejalaika perintah dikena nyapai tuju nya.

“Perintah endang bebendar nagang enggau mutarka penanggul besai tu enggau naka pengelengkas.

“Nya kebuah perintah udah nambahka agih belanja ungkup program betuchuk vaksin ari RM3 bilion ngagai RM5 bilion dikena ngerumban pengawa tu,” ku iya.

Ali mansutka jaku nya lebuh bejadika program Penerang Pekara Kemaya Hari diatur Opis Pemadah (JaPen) Malaysia Sarawak ba Rumah Dayak, ditu, pagi tadi.

Iya ti mega Kaban Parlimen Saratok nyemetak madah, agih belanja nya ditambah ngambi tagit komuniti kebal ari igi penyakit Covid-19 ulih dijapai datai ba bulan Disember taun tu.

Suara Sarawak