GEDONG: Perintah Sarawak deka berundingka agih tambah enggau pemanjai jalai raya Projek Jalai Raya Sarawak-Sabah Link Road (SSLR).
Ku Premier Sarawak, Datuk Patinggi Tan Sri Abang Johari Tun Openg, pekara nya deka digaga pengudah sida meda gaya ti ditunjukka dalam pejalai projek nya.
“Kitai deka meda gaya enti gaya manah, tentu kitai meri bantu mega,” ku iya.
Abang Johari ti mega Adun Gedong bejaku munyi nya pengudah bejadika Program Sarawak X-Tive Renggat Nengeri 2022 di Gedong, kemari.
Lebuh ditanya baikka bantu nya mungkur meri tanah perintah bagi ngelancharka projek tu, Abang Johari madahka iya enda ulih ngelansa dalam laban bedau nemu penerang pasal projek nya.
“Diatu, aku enda nemu,” ku saut iya pandak.
Ensana, Menteri Besai Datuk Seri Ismail Sabri Yaakob dalam siti penerang madahka Perintah Besai besetuju nambah pejalai projek SSLR enggau Projek Jalai Raya Trans Borneo (LBT).
Ku iya, pekara nya disetuju lebuh Aum Kabinet Hari Lima dikena ngemenuhka pengawa ngaga Jalai Raya Pan Borneo (LPB).
Ismail mega madahka renggat keterubah LPB pemanjai 786 kilometer udah nyapai 78 peratus tembu naka diatu.
Ku iya, perati deka diberi ngagai kunteriktor menua kelebih agi bumiputera awakka ulih meri peluang dagang sereta peluang pengawa puang ngagai Malaysia Sebilik.
Ku iya, nya mega deka ngemanahka penumbuh enggau pengerembai ekonomi, kelebih agi objektif perintah ti deka terus negapka sektor dagang sereta muka 600,000 peluang pengawa puang taun tu.
