Agih ngaga Jematan Batang Lupar ukai masau duit tang ke pemaik rayat

KUCHING: Agih belanja ngaga Jematan Batang Lupar ukai masau duit tang mantu nyungkak ekonomi peranak kandang menua nya.

Kaban Parlimen Batang Lupar Datuk Sri Rohani Abdul Karim madah iya tekenyit ninga jaku ti dipansutka Chairman Parti Tindakan Demokratik (DAP) pampang Sri Aman Leon Jimat Donald ti madah agih belanja RM1 billion ngaga Jematan Batang Lupar semina masau duit aja.

“Aku tekenyit ninga iya (Leon) madah munyi nya, laban ngelama tu kami endang bebendar mintah agih belanja ngaga jematan nya ungkup guna peranak selampur Sarawak.

“Ukai semina ngaga jalai ngagai selampur Sarawak aja tang nuju Brunei enggau Sabah taja nguna belanja ti besai,” ku iya.

Rohani bejaku munyi nya ngagai pemberita lebuh Pengerami Ngelalu Pengabang Hari Raya Aidilfitri ba rumah iya empu di Jalai Gita ditu, ensana.

NERANG…Kaban Parlimen Batang Lupar Datuk Sri Rohani Abdul Karim (kanan) benung nyaut tanya pemberita maya Pengerami Ngelalu Pengabang Hari Raya Aidilfitri diatur iya di Jalai Gita ditu, kemari. Sama bisi dipeda Adun Beting Maro Razaili Gapor (kiba).

Kelimpah ari nya, Rohani madah semua pengawa ti digaga iya mutarka penanggul ngaga Jematan Batang Lupar nya endang meri penguntung ngagai rayat.

“Iya (Leon) patut berunding baru laban pengawa tu digaga ke pemaik bala rayat Sarawak kelebih agi sitak nya.

“Enti jematan udah tembu ila, mayuh pemansang ba sitak nya ulih diadu baka nanam nanas, nanam nyiur enggau nanam padi ba tanah ti dikelala ami endur betanam,” ku iya.

Nangkan ke nya, iya madah enggau pekara nya peranak menua ulih nyual utai ditanam sida ngagai luar nengah Jematan Batang Lupar ti besambung enggau jalai besai bukai di menua tu.

“Sida orang betanam enggau bumai dia selalu madah enggau aku, sida endang nitihka jaku aku ngasuh sida betanam nanas, nyiur enggau padi tang semina masau tulang aja laban nadai orang deka meli.

“Tu ketegal setengah ari penguntung bejual endang dikena bebayarka tambang aja.

“Enti jematan tu bisi ila sida ulih bedagang niti jematan nya ngagai menua bukai sereta nyimatka ungkus belanja tambang ti besai laban bisi perengka pengangkut kediri,” ku iya.

Sama bisi datai ba pengerami ngelalu pengabang ba rumah iya Adun Beting Maro Razaili Gapor sereta bala bukai.