Agih RM10 juta ‘perais’ nyerumba Hari Sarawak

MATU: “Terima kasih Perintah Sarawak laban udah meri agih belanja dikena nyeleti enggau ngemanah rumah panjai kami,” ku Ketuai Komuniti Kampung Sok, Lauyah Napi.

Ku Lauyah Napi madah, agih belanja RM10juta ti deka diberi perintah tu perais pemadu berega ngagai semua peranak Melanau.

Pia mega ku Lauyah, inisiatif tu ukai semina nyaga pesaka asal tang mega nyendika peluang ekonomi baru ngagai peranak kelebih agi dalam sektor bekaul dagang temuai.

“Kami agi nganti berita manah tu kenyau ari suba lalu ke diatu niat nya deka nyadi nyata.

“Ba penemu aku, berita tu perais pemadu berega kelebih agi lebuh kitai ngintu Hari Sarawak,” ku iya madah ngagai pemberita Suara Sarawak.

RUMAH ASAL MELANAU… Pesaka asal ti agi diuan nyentukka diatu.

Nambahka nya ku Lauyah, rumah panjai Melanau Sok penyauh 110 kilometer ari mengeri Mukah enggau beumur beratus taun tu tetap tegap nyadi pesaka asal raban bansa Melanau Sarawak nyentukka sehari tu.

Rumah panjai tu didiri ba taun 1870-an lalu ngembuan 26 pintu ti matak temuai ba wilayah tengah Bumi Kenyalang.

Struktur asal rumah panjai tu ku Lauyah digaga ari pun kayu kampung, kayu tebelian seraya perabung iya digaga ngena daun mulung sebedau diganti ngena zink.

“Ba luar rumah nya baka selama tang bebida enggau rumah panjai Iban iya nya ruai rumah tu.

“Tiang kayu tebelian agi tegap nyentukka diatu. Kitai pechaya umur rumah tu udah manggai beratus taun,” ku Lauyah.

Nangkanka nya ku iya, kelimpah struktur asal ti tegap nyentukka diatu, rumah nya mega agi ba endur asal lebuh digaga suba iya nya enda jauh ari sungai mit.

Ku Lauyah, dulu suba nyauka tiap genturung pendiau di Matu ngembuan sebuah rumah panjai.

” Tang ubah jeman ngujungka mayuh peranak deka ngentak rumah kediri empu.

Pekara tu ngujungka rumah panjai tu puang enggau midang. Bisi sekeda ti midang ketegal penusah angus lalu tu aja rumah panjai ti bisi ditu.

” Kelimpah ari nya, piak Muzium Sarawak ngaku rumah panjai Melanau tu nyadi siti pesakal asal ti patut dijaga kenyau ari taun 1987 pengudah beratika penyelai rumah panjai tu,” ku Lauyah nerang.