Agih RM30 juta udah disua ngagai PTPTN dikena mantu anak Sarawak mayar laluh utang

KUCHING: Sarawak nyendiaka agih belanja RM30 juta dikena mantu raban nembiak Sarawak ti napi penanggul mayar pulai duit injau ari Opis Wang Turu Pelajar Tinggi Nasional (PTPTN), ti ngujungka menua tu nyadi nengeri keterubah ngembuan inisiatif baka nya mantu nembiak.

Kepala Menteri Datuk Patinggi Abang Johari Tun Openg madahka penanggul nembiak nya didinga iya empu lebuh ngatur randau enggau nembiak Sarawak ke belajar di Semenanjung Malaysia dalam Program Lan Berambeh Anak Sarawak di Kuala Lumpur kena Oktober 2019.

“Asil randau nya, aku meri agih belanja RM30 juta dikena mantu nembiak mayar duit injau ngagai PTPTN,” ku iya ba Program Nyerahka Sempekat Pemerti Ati entara Yayasan Sarawak enggau PTPTN di Wisma Bapa Malaysia ditu, kemari.

Ba baruh MoU nya, Yayasan Sarawak deka nguna agih belanja tu nyendiaka inisiatif ngagai nembiak Sarawak ti udah mayar pengabis nadai 30 peratus ari penyampau injau sida.

Abang Johari madahka Yayasan Sarawak bisi ngembuan chara dalam ngatur pengawa mayar baru duit injau nembiak ti dikearapka ulih mutarka penanggul sida.

Nangkan nya, Ketuai Pemesai PTPTN Ahmad Dasuki Abdul madahka inisiatif tu siti ari chara ti proaktif sereta manah dikena nampung penyampau pinjau nembiak ngagai PTPTN.

“Inisiatif perintah nengeri tu patut dipuji lalu tau ditunda nengeri bukai dikena mantu rayat sida mayar laluh pinjau PTPTN,” ku iya.

Iya madahka naka 31 Disember taun siti nyin kemari, PTPTN udah meri duit injau beungkus RM4.7 billion ngagai 195,350 nembiak di selampur menua ke alai 3,429 penginjau ‘dikecualikan’ mayar baru pinjau beungkus RM88.7 juta laban mujur bulih Degree Kelas Pemadu Tinggi (Ijazah Sarjana Muda Kelas Satu).

Berebak enggau nya Direktor Yayasan Sarawak Azmi Bujang mega madahka inisiatif tu endang dikena mantu penginjau PTPTN anak Sarawak mayar pulai duit injau sida.

Ku iya 9,000 nembiak Sarawak mujur bulih pemaik tu pengudah dipantis PTPTN. -Bernama

Suara Sarawak