KUCHING: Yang di-Pertuan Agong Sultan Abdullah Ri’ayatuddin Al-Mustafa Billah Shah ngabas raban orang tasah bah di Palan Ngenduh Sementara (PPS) Kelab Sultan Sulaiman, Kampung Baru, Kuala Lumpur tadi.
Nengah sebengkah penerang dibantai ba laman Facebook ari Istana Negara, Agong ngambi awak nyau deka sejam berandau sereta betemu enggau sida ti diau ba PPS nya berengkah pukul 11.15 pagi.
Iya mega bisi meri bantu ngagai sida ti tasah lalu andalka bantu nya ulih ngelempungka tating belanja ti ditapi sida bekau ari bah nyengit ti nyadi dua hari ke udah lalu.
Kelimpah ari nya, Agong mega meri bantu ungkup empat agi PPS bukai iya nya di Balai Mensia Mayuh Hamzah (Dang Wangi), Palan Komuniti Sentul, SRJK Tamil Saraswathy enggau Dewan Sri Endah Seputeh di Brickfields.
Taja berasai sinu, iya ngarapka rayat ti kena pangka penusah tu besabar sereta nerima penguji ti ditapi sida.
Iya mega ngelalau rayat ngambi terus nyaga atur enggau lalau ti dikeluarka perintah dalam nyaga pengelikun diri enggau ruang bilik.
Berebak enggau nya, Agong mega ngarapka semua orang besedia napi gaya hari ti enda manah ba bulan Disember enggau Januari taun baru.
Iya mega minta semua ejensi perintah bekaul meri bantu ngagai sida ti napi penusah enggau lengkas baka khemah ti chukup ba PPS bagi pengelantang sida.
Dua hari ke udah, indu menua (ibu kota) di Kuala Lumpur, Shah Alam enggau Klang napi penusah bah ngenyit ti jarang nyadi lalu udah ngujungka urung 30,000 rayat kandang menua nya dipindahka ngagai PPS.
