Agu kedai makai meseti seruran beresi

Tikas pemeresi agu ba sitak dikuasa MPS bedau ngemantup ati

SIBU: Sapit Chairperson Kaunsil Kandang Menua Sibu (MPS) Rogayah Jamain madahka tikas pemeresi agu mensia mayuh ditu bedau tentu manah.

Rogayah madah, agu mensia mayuh ti enda tentu manah baka ba kedai makai ngelingi mengeri tu.

“Taja gred udah lama dilekat tang penyedar pasal pekara tu agi kurang ba sekeda orang ti bempu kedai.

“Beduduk ari nya, semua piak patut ngembuan tanggung pengawa nyaga pemeresi agu mensia mayuh.

JAGA PEMERESI AGU… Rogayah (mua, empat kiba) begulai enggau penyereta pengudah bejadika Kimpin Agu Beresi di Sibu.

“Mensia mayuh, piak kunterikta enggau pengempu kedai mega ngembuan tanggungpengawa nyaga pemeresi jamban ngambika seruran beresi,” ku Rogayah mansutka jaku rambau bejadika Kimpin Agu Beresi beserimbai enggau Hari Jamban Sibu di sebuah hotel, ditu lemai kemari.

Kenu ku Rogayah, pemeresi agu mensia mayuh tu nyadi penyukat tikas pemeresi sebuah mengeri tauka menua.
Ngelansa pasal kimpin, iya madahka kimpin tu diatur ngambi ulih meri penyedar bekaul guna nyaga pemeresi jamban mensia mayuh kelimpah chara ti betul meresi jamban.

“Ba menua maju, semua piak bekerejasama nyaga pemeresi agu mensia mayuh. Nyema kitai nemuai ngagai menua luar, kitai deka meda tikas pemeresi agu sida.

“Nya alai, semua piak patut bekerejasama enggau piak penerit adat ngambika agu mensia mayuh seruran beresi,” ku Rogayah.