KUALA LUMPUR: Agum ti diasilka siku nembiak Iban, Wesley Juntan nerima perati ari Opis Menteri Dagang Temuai, Seni enggau Main Asal (Motac) ti deka mantu ngerembaika asil iya nyadi produk dagang temuai baru.
Menteri iya, Datuk Seri Nancy Shukri madah, asil keranjai jari Wesley bepengulih nyadi produk dagang temuai ti ulih dijual dalam enggau menua luar.
“Asil keranjai jari diasilka Wesley tu meri penemu ngagai aku ngambi agum iya ulih nyadi produk dagang temuai baru bepelasarka seni enggau main asal,” ku iya meri penerang, ditu kemari.
“Aku madah ngagai Wesley, utai dikerindu iya tu ulih nyadi dagang ngambi ngaga mayuh agi agum ti ngerasuk pekayan asal Malaysia baka tu enggau nyual agum nya ngagai menua luar,” terang Nancy.
Pengelandik Wesley tu ayan sebelah media rama apin lama pengudah iya ngasilka agum ti dirasuk ngena pekayan asal etnik Sarawak enggau dikerindu mensia mayuh.
Terang Nancy, opis menteri iya deka telefon ngagai sida ti bepenau enggau ejensi baka Kaunsil Krafjari Malaysia ngambi mantu bekaul ngerembaika pengawa ngasilka produk.
Berindik ari nya, iya meransang mensia mayuh ngambi terus mantaika inovasyen enggau kreativiti lebuh nengkebang produk dagang temuai, seni enggau main asal ti nyelai enggau bisi pengelain kediri empu.-BERNAMA.
