SARATOK: Penyadi ampuh bah ke ngampuhka kandang emperan semak rumah panjai Empelaie Ulu, ditu ngasuh tekenyit.

Tuai Rumah Gending anak Danggat madahka diri balat chukup tekenyit meda ai Sungai Assam bah berindik ari ujan bangat malam kemari.

“Suah ke endur nya kena bah tang enda ngemalat baka kemari, tu mih ke pemadu besai pengudah 65 taun ke udah,” ku iya.

Nangkan ke nya, Tr Gending madah utai ti balat ngirauka ati sida serumah tanah ba baruh rumah ari ulu nyau majak tusur ketegal kena ampuh bah.

“Penanggul tu suah endar udah dibai ngagai ajensi tauka opis ti bempu kuasa, tang naka ke diatu lalu bedau bisi sebarang bekau diputarka sida.

“Nya alai sekali tu kami serumah ngarapka bisi raban ti bekuasa datai ngabas, lalu berundingka chara mutarka penanggul kami tu,” ku iya.

Mua ke lemai, naka berita tu ditulis gaya tikas penalam ai udah berengkah surut.

Ungkup penemu, rumah panjai Empelaie Ulu bisi 26 pintu ruang bilik.