AirAsia dipilih ngemujur Kimpin Nemuai Ke S’wak

KUCHING: Lima bilun AirAsia udah dipilih ngelakuka Kimpin Nemuai Ke Sarawak (VSC) dilekat ba endur nyimpan kantung besai enggau dulang pemakai.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madahka endur nyimpan kantung besai enggau dulang pemakai deka disempulang sepuluh gambar iklan ti bebida ba genap bilun.

“Ba penerebai dalam menua, lima bilun nya terebai ngagai Kuala Lumpur, Miri, Kota Kinabalu, Langkawi, Johor Bharu, Kuala Terengganu, Alor Setar, Pulau Pinang enggau Kuching.

“Ba renggat entarabansa, lima bilun tu deka terebai ngagai semua menua Asean baka Singapore, Vietnam, Indonesia, GuangZhou, Shenzhen, ChengDu, Bangkok, Phuket enggau menua bukai,” ku iya lebuh bejadika kimpin nya di Padang Bilun Entarabansa Kuching (LTAK), ditu tadi.

Karim madahka kimpin tu dipejalai kandang 12 bulan lalu nagit 15 juta meda iklan nya.

BEJADI… Datuk Abdul Karim Rahman Hamzah meri tanda sukung lebuh bejadika iklan ba endur nyimpan kantung besai bilun AirAsia Airbus 320 di LTAK di Kuching, tadi.

“Bilun AirAsia Airbus 320 ti mai 180 penumpang nyempulang iklan tu lebuh timpuh dilanjar nyentuk 24 bulan.

“Nya alai, aku ngarapka inisiatif iklan baka tu ulih matak mayuh agi bala temuai ngagai Sarawak nyerumba VSC,” ku Karim nerang.

Ku Karim, 2,239,206 temuai nemuai ke Sarawak dalam timpuh suku kedua taun tu.

“Penyampau tu bisi nambah 4.58 peratus dibanding timpuh sama taun nyin kemari, 2,132,529 temuai.

“Bulan June tu kitai nerima 432,575 temuai, niki 13.27 peratus dibanding timpuh sama taun nyin tadi semina ngerikod 381,889,” ku iya nerang.

Nya kebuah iya ngarapka penyampau temuai nemuai ke Sarawak deka nambah lalu kitai ulih nyapai tagit lima juta nya.

Suara Sarawak