ARTIKEL

Ajar nembiak nyaga pemeresi agu sekula

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Gerempung Pengajar Bumiputera Sarawak (KGBS) nyukung jaku lalu Menteri Besai, Datuk Seri Anwar Ibrahim ngambi sida ngajar bala nembiak nyaga pemeresi agu sida empu ba sekula.

Presiden KGBS, Zulkiflee Sebli madah, pekara nya endang patut dipejalai ba sekula ari kelia laban agu endang perengkaguna ungkup semua lalu seruran dikena.

“Aku empu meda, agu ti beresi sereta nyamai dikena endang siti chara nempa kualiti pelajar kelebih agi ngaul pengawa Belajar engggau Ngemuntang Chara (PdPc).

“Nembiak engau pengajar udah tentu deka asai lebih nyamai enti agu beresi sereta enda bebau, laban enti sema bebau, nya deka nyadi penanggul kelebih agi ba agu ti semak enggau bilik kelas tauka bilik pengajar,” ku iya.

Empai lama, Anwar ngelalau perkara nya laban iya endang chara ti patut dikena ngajar sida nyaga pemeresi pengudah mayuh agu ke endang fasiliti khas ungkup peranak sekula di menua tu enda dijaga manah.

Ku iya, bala nembiak patut ngaul pengawa nyaga pemeresi agu sereta diberi pengawa ngena chara berenggat kelimpah kimpin pemeresi ulih raban sekula ti seruran dipejalai enggau kerejasama Gerempung Apai Indai sereta Pengajar (PIBG) dikena nentuka iya ukai semina angat ba pun aja.

Bekaul enggau nya, Zulkiflee nambah apai indai mega meseti meda pekara nya ari sukut positif sereta pemesai reti meri penyedar pasal tanggungpengawa nyaga pemeresi agu ba sekula ngagai bala anak sida.

“Apai indai mega udah tentu pedis ati lalu nganu anak enti agu ba rumah sida kamah.

“Kelimpah ari nya, anak mega deka diberi jaku lalau ngambi seruran nyaga pemeresi agu di rumah.

“Enti sida ulih diajar nyaga pemeresi agu di rumah, nama kebuah enda di sekula?

“Kitai ngaku mayuh agu di sekula rusak ketegal ulah mensia, aku mega suah ngingat ke bala nembiak ngambi ke sida nyaga agu di sekula baka nyaga agu di rumah,” ku iya.

Ba lansa sama, iya madah penyedar nya meseti diterenah ngambi ulih ngajar sida sama bela nyaga pemeresi agu.

“Apai indai anang irau enti bala anak diasuh nuchi agu laban raban sekula bisi pengelandik nusun atur taga pengawa lalu enda ngachau jam PdPc,” ku iya nyemetak.

Iya madah, KGBS nyukung 100 peratus pengawa ngajar nembiak nyaga pemeresi agu.

“Kerejasama apai indai mega beguna dikena meri penyedar ngagai sida.

“Raban sekula mega meseti ngatur taga pengawa nembiak ti dipatau ngambi juluk enggau tuju program tu ulih dijapai,” ku iya.

Seraya nya, pasal agu pengajar ba sekula, KGBS minta Opis Menteri Pelajar Malaysia ngasuh bala kunteriktor nyendia mayuh agi agu duduk dibanding enggau agu lama.

“Kitai nemu ketebal agi bala pengajar ba mengeri udah lunggar umur lalu bisi penanggul pengerai.

“Bisi sekula ke nadai agu duduk ungkup pengajar lalu pekara tu beguna amat ungkup penyamai sida,” ku iya.

BERITA LAIN

2,000 belanda seraya ngintu rampa menua

KUCHING: Urung 2,000 penyereta ngulu program belanda pengasih besuluka jaku Run To Save Lives 4.0 ti belabuh ba mua Majlis Bandaraya Kuching Selatan (MBKS), ditu

BERITA TERBARU

Teknik eratkan hubungan keluarga

SIKAP SEDERHANA keluarga adalah suatu cara hidup yang mendasarkan diri pada prinsip kesederhanaan, kecukupan dan keutamaan dalam setiap aspek. Pendekatan ini dapat mengeratkan hubungan ahli