Akim enggau juri profesional nentuka kualiti pemutus pekit

Bengkel Juri Pekit Belagu

Akim enggau juri iya nya orang ke bempu tanggungpengawa berat nyaga sereta nentuka pemutus sesebengkah pekit besai. Orang ti dipilih mangku tanggungpengawa tu endang orang ke dikearap ulih nyaga pemanah nama, imej enggau kualiti pekit.

Enda milih dini enggau enda milih sapa ti ngatur pekit belagu tauka anugerah di dunya tu, tetap bisi orang ti enda lantang ati laban sida nemu nyadi akim enggau juri kediri.

Nya alai, akim enggau juri ti bisi pengelandik tikas profesional beguna dikena ngurangka bantah enggau orang ti enda lantang ati.

Kena 30 Julai 2019 tu tadi Gerempung Armada Anak Seni Sarawak (Aras) udah mujur ngatur Bengkel Juri Pekit Belagu ti diatur ba Mini Auditorium Kompleks Belia dan Sukan Kuching.

NYADI KENANG….Semua penyereta bengkel begambar kenang begulai enggau Patrick Kamis enggau Asmin Mudin.

Bengkel nya udah mujur narit 30 iku penyereta enggau dua iku speaker. Bengkel nya diatur sehari berengkah ari pukul 8 pagi nyentuk 5 lemai. Tebal agi orang ke datai ngulu bengkel nya raban artis, komposer, penulis leka lagu enggau sida ti chakah ba industri pemerindang di Sarawak. Dua segmen bengkel diatur; siti muak ke pagi lalu siti muak ke lemai.

Bengkel Renggat 1 : Patrick Kamis

Patrick Kamis siku komposer ari Sarawak ke udah lama tebilang mayuh ngangkatka bala penanyi ti tebilang nyengkaum niang Achik Spin, Nordiana enggau Lyiana.

Kelimpah ari ngaga lagu penanyi solo, Patrick diatu mengkang gawa perintah bisi mega ngaga lagu ungkup raban band. Entara lagu tebilang Patrick nya Niat (Elyana) enggau Memori Berkasih (Acik Spin & Siti Nordiana) ari baruh perabung FMC Music.

Lebuh dirandau pasal bengkel ti diatur maya nya, Patrick madah udah datai maya hakim enggau juri nyanyian di Sarawak nyikap diri empu enggau penemu ti betul ti engkeman enggau peminta tauka guna ba semua pekit belagu ke makin mayuh diatur di menua tu.

“Udah datai maya akim enggau juri di Sarawak ngembuan penemu ti betul (pengelandik khas) awakka sida bisi pemandai datai ari orang tauka ejensi ti profesional.

Patrick Kamis

Kebuah pia awakka sida iya ulih nyadi akim enggau juri ti bepenemu sereta diberi kad ari MyIPO (Perbadanan Harta Intelek Malaysia).

MyIPO nya siti ejensi ke bekuasa meri rega (standard) ba semua utai ti gaga (harta intelek) ti tau didagangka kitai”, ku Patrick Kamis nyaut tanya ti keterubah ba randau kami sebuat ba pengujung bengkel nya.

Ngenang batang tuju Aras, Patrick Kamis enggau chara positif pechaya Aras ulih nitihka atur sida di Semenanjung Malaysia ba chara nyaga enggau ngumpul royalti lagu etnik di Sarawak.

“Aku pechaya Aras sereta enggau sukung perintah bekuasa di Sarawak sereta enggau mensia mayuh, niat enggau langgur kitai nyaga enggau ngumpul royalti lagu di Sarawak ulih dikereja kitai.

Ngena peluang tu aku begunaka sukung semua artis, pemuzik, komposer enggau kompeni rikod sama masuk nyadi kaban Aras. Enti kitai ulih begempung betulung ditu, semua perambu enggau niat kitai ulih mujur dikereja. Iya ti bendar aku deka kitai ari Sarawak ngatur pekara tu kediri nitihka chara kitai empu. Sida di Semenanjung udah lama idup ari royalti lagu sida.

Asmin Mudin

Enti kita nanya nama kebuah, laban sida begempung enggau pangan diri nengah siti gerempung enggau ketuai ti dipechaya sereta udah dipaduka sida. Seagi kitai enda ulih ngereja tu seagi nya mih lagu kitai Iban enggau lagu ari Sarawak nadai ngasaika penyamai ari utai ti dikumbai royalti,” ku
Patrick.

Bengkel Renggat 2 : ASMIN MUDIN

Speaker ti kedua ba Bengkel Juri Pekit Belagu dikemujur Presiden Gerempung Komposer enggau Penempa Video Muzik Sabah (SCORE), Asmi Mudin.

Asmin siku komposer ke lama udah tebilang di Malaysia. Iya kala nengkebang lagu ke pemadu tebilang Malaysia disadaka Ziana Zain (Anggapanmu), Sayang Kinabalu (Kimin Mudin) ke chukup tebilang di Sabah. Ngembuan pelajar ba bidang muzik Asmin nyadi siku orang ke dikelala mensia mayuh ke selalu nyadi juri enggau akim profesional di Sabah.

Lebuh dipinta meri komen pasal bengkel juri pekit belagu nya, Asmin madah juri enggau akim enggai nyadi nadai penemu ti standard dalam bidang nyadi juri.

Tuju ti bendar bengkel ke bansa tu dikena nyungkak sereta ngangkatka penau bala hakim enggau juri. Ukai reti sida ti “perfect” tang sekurang-kurang iya kitai ulih ngurangka jaku bantah ti negatif enggau enda puas ati ari mensia mayuh.

DJ Ivee Ubang

Taja pia, akim enggau juri ba tikas dunya pan enda ulih nyeliahka bantah ari orang mayuh. Taja pia sida bisi kebuah lalu ari nya isu enda puas ati mensia mayuh nyangka ulih dikurangka agi”, ku Asmin.

Royalti lagu etnik

Maya ngelansa pasal royalti lagu etnik Sarawak / Sabah, Asmin mai anak seni di Sarawak begulai sejalai enggau sida di Sabah ngumpul sereta magi royalti kediri ngena chara kitai ditu empu.

“Aku arap Sabah enggau Sarawak ulih begempung ba pekara tu. Kitai diatu enda ulih bepanggai ba orang bukai ngumpul enggau magi royalti nya. Enti kitai enda enda ulih begempung sereta seati ba pekara tu seagi nya mih lagu etnik Sarawak / Sabah dibasau pia aja,”.

Kitai enda ulih nyalahka orang bukai laban kitai empu enggai kiruh. Nya alai, Aras enggau Score meseti bisi kaban ti chukup; abis nadai 300 iku”, ku Asmin.

Siku agi personaliti ke sempat dipinta meri komen pasal bengkel juri nya DJ Ivee Ubang. Ivee iya siku artis ke udah dulu tebilang ba dunya pemerindang lalu udah kala ngeluarka album solo enggau kompilasyen. Siti single pemadu baru, diberi nama Menyati ari baruh Ranyai Sound Studio.

“Ba aku program bengkel tu chukup badas awak ke tiap pekit enggau orang ke bepekit diberi poin enggau chara ti adil. Manah amat enti bala akim enggau juri ngena penemu ti udah dipelajarka sida enggau chara ti profesional.

“Taja pia, bisi mega jaku bantah enggau enda puas ati ketegal juri enggau akim ti dipilih bedau chukup betul ba chara sida ngakim orang ti bepekit.

“Kebuah pia ku sida sekeda akim enggau juri ukai orang ti ba bidang pengawa iya”, ku Ivee ke endang enda ulih duduk jenuh belagu enggau nyadi emcee di serata Sarawak.

Ukai reti orang ke udah enggau bengkel tu nyadi akim enggau juri ti “perfect”. Iya ti bendar bengkel tu kena nambahka penemu ti udah bisi ba bala juri endur sida belajarka tip, konsep enggau prinsip ti betul. Ari nya sida nyangka ulih ngurangka penyalah enggau penyaru lebuh nyadi akim enggau juri.

Ngena peluang tu kitai arapka bengkel tu ulih diterima enggau penemu ti positif laban pemanah iya pulai ke penguntung semua. Arap ba maya ke bukai, bengkel ke sebaka ulih diatur ba endur bukai awak semua orang ti rinduka pengawa tu bela ampit penemu ke manah.