Aktiviti kuari CMS ngeruga pengelikun

Perintah Nengeri patut beratika pekara tu – Chieng Jen

KUCHING: Aktiviti Stabar kuari Cahaya Mata Sarawak (CMS) di Kota Sentosa, Batu 7 ngirauka peranak sitak nya.

Kenu ku Adun Kota Sentosa Chong Chieng Jen, pengawa nambahka kuari enggau pengawa ngebom batu di kuari tu ngeruga pengelikun peranak di Taman Mei Lee enggau peranak ngelingi sitak Batu 7.

Chieng Jen madah, penyauh kuari enggau genturung pendiau iya nya 250 meter ngujungka peranak irau kuari tu majak nambah enggau kelalu dampih enggau genturung pendiau sereta mensia mayuh.

Iya nambah, sida irau laban aktiviti di kuari tu ulih ngasuh tanah tusur enggau penusah nabanka nyawa nyadi laban kuari nya ngembuan penalam 10 ringkat.

“Pekara tu ba baruh autonomi Perintah Sarawak lalu sida patut beratika pekara tu.

“Aku minta Perintah Sarawak bejalaika pengawa meresa sereta mansik pasal struktur tanah ti dikena enggau nadai ngaul pasal politik,” ku iya.

Iya madah munyi nya ba aum media di Opis DAP Padungan, kemari.

Chieng Jen mega madah, sida udah madahka pekara tu ngagai Opis Menteri Ai, Tanah enggau Pengereja Asal ngambika nulis surat ngagai Perintah Sarawak.

“Aku ngarapka bisi beratika Pangka Rampa Menua (EIA) diatur meruan dikena mansik struktur tanah ba kuari nya,” ku iya.

NGERUGA PENGELIKUN… Chong Chieng Jen nunjukka poster taba Stabar kuari ti dampih enggau genturung pendiau.

Suara Sarawak