Aktiviti main asal deka dipandang ninting minggu

KUCHING: Pengerami ‘Malam Harmoni Sarawak’ diperambu diatur ninting minggu ba mengeri Kuching.

Sekretari Mendam Opis Menteri Dagang Temuai, Seni, Main Asal, Nembiak enggau Lumba, Hii Chang Kee madahka perambu tu dikena ngerichahka agi pengerami tauka aktiviti ba Tebing Sungai Kuching ninting taun.

“Kitai ngarapka aktiviti mandangka main asal tu suah agi diatur ngambika komuniti dia suah nyereta pengerami baka tu,” ku iya.

Hii mansutka jaku nya lebuh ngarika Menteri Dagang Temuai, Seni enggau Main Asal Datuk Abdul Karim Rahman Hamzah rambau bejadi Malam Harmoni Sarawak di Tebing Sungai Sarawak, malam kemari.

Kenu ku iya, aktiviti diatur Kaunsil Seni Sarawak nya dikeandal ulih merindang semua serap komuniti ba mengeri tu kelebih agi maya ujung minggu.

“Nambahka nya, pengerami tauka aktiviti baka tu mega ulih matak temuai ke raun ngelingi mengeri Kuching,” terang iya.

Hii madahka Sarawak endang kaya ari sukut main asal enggau ngembuan 27 raban bansa ke patut dijaga meruan ngambika Sarawak majak dikelala ba serata dunya.

Berebak enggau nya, iya minta semua komuniti semak dia sampal datai ngambi ngerichahka agi Tebing Sungai Kuching enggau nyereta Malam Harmoni Sarawak ngambika endur ti ditapatka temuai semampai rami.

Kelimpah ari nya, Hii mega andalka Malam Harmoni Sarawak ulih mantu ngemujurka Kimpin Nemuai Ke Sarawak taun tu nyentuk meri empas positif ngagai industry dagang temuai ba menua tu.

Suara Sarawak