LAWAS: Raban nembiak diatu keranka polisi pemansang ti meri pemaik ungkup timpuh panjai dalam nentuka pemansang nengeri ba maya ti deka datai.

Kepala Menteri Datuk Patinggi Abang Johari Abang Johari Tun Openg madahka ketegal nya iya ngelanggur mayuh pekara ungkup nembiak kelebih agi pemansang ngagai taun 2030.

“Bisi orang madah, kami di Gempung Parti Sarawak (GPS) takut ke Undi18.

“Aku nadai takut, laban nama ti diperambu aku diatu ungkup nembiak rebak baru,” ku iya.

Abang Johari bejaku munyi nya rambau Bejadika Sarawak Linking Urban, Rural and Nation (Saluran MYSRBN) di Masegit Baru Trusan, Lawas ditu, kemari.

Ku iya, lebuh umur sida majak tuai dia raban nembiak deka nganti sida neruska pemansang enggau perambu ti digaga sida diatu.

“Aku diatu udah umur 70 taun, dalam kadang 10 taun agi umur aku manggai 80 taun, ni aku ulih gawa agi.

“Tang sida ke biak, umur 20 taun pansut universiti umur 21 taun, dalam kandang 10 taun sida deka beumur 31 taun.

“Nya meh, umur benung endur sida neruska perambu ti digaga enggau dilanggur kitai diatu.

“Nya alai, raban nembiak mesti nemu dini alai menua kitai dudi hari,” ku iya.

Ku iya, juluk ati ngulihka menua ngembuan penatai pemisi ti tinggi deka nyadi pengingin nembiak awakka sida ulih gawa seriris enggau tikas ekonomi menua.

“Nyema ekonomi kitai baruh, sida enggai gawa ditu, sida gawa ba palan bukai.

“Tang, enti ekonomi kitai manah, sida deka bisi latih baka latih digital, sida deka gawa dalam bidang nya ngemansangka menua kitai,” ku iya.

Kelimpah ari nya, iya madahka ba taun 2022 ngagai 2023 bisi agi model baru digaga sida dalam nambahka penatai pemisi menua dikena mantu rayat.

“Bajet nengeri kitai ba taun 2022 bisi RM10 billion ke alai ungkup pemansang bisi RM7 billion.

“Lebuh ditambah enggau bajet ti diberi Perintah Besai RM4 billion, kitai bisi RM11 billion dikena ngemansangka menua,” ku iya.

Nya alai, iya madahka diri pechaya lebuh diberi mandat megai perintah baru, sida deka bebendar agi ngemansangka menua tu ngagai taun 2030 ila.