KOTA KINABALU: “Aku enggai nyebut nama tang bisi orang madahka aku tu ‘perintah pintu depan’ lalu bisi mega nyebut ‘pintu belakang’ tang aku deka madah ngagai kita semua, aku tu (PM) datai ari pintu Astana,” ku Tan Sri Muhyiddin Yassin.
Menteri Besai mansutka pekara nya ngelansa pasal pengawa numbuhka perintah baru mesti dipejalai bepelasarka Konstitusyen Perintah Besai enggau bepanggai ba pemutus Yang di-Pertuan Agong Al-Sultan Abdullah Ri’ayatuddin Al-Mustafa Billah Shah.
Ku iya, Malaysia nya menua ti ngemeran sistem demokrasyen beparlimen ti disukung sistem konstitusyen. Nya alai, konstitusyen mega dikena nentuka pengawa ngaga sebarang pemutus ti deka dipejalai.
“Sebarang penerang (dawa) ti dibantai sapa-sapa mesti digaga bepelasarka nitihka konstitusyen.
“Aku enggai nyebut pekara nya laban semua nya bepanggai ba pemutus Yang di-Pertuan Agong, tang aku agi bediri ditu lalu agi nyadi Menteri Besai,” terang iya.Muhyiddin mansutka jaku nya ba Pengerami Begulai enggau Menteri Besai di Luyang, ditu kemari.
Presiden PKR Datuk Seri Anwar Ibrahim ba aum pemberita madahka diri bulih sukung ti tegap ari Kaban Parlimen dikena numbuhka perintah baru nukar Perintah Perikatan Nasional (PN) diketuai Muhyiddin.
Nambahka nya ku Muhyiddin, iya agi mangku pengawa nyadi Menteri Besai lalu iya bempu tanggungpengawa ungkup semua rayat Malaysia.
“Taja pia, penatai aku (nyadi Menteri Besai) nyadi ketegal penyarut nyadi pengudah Tun Dr Mahathir Mohamad ngemaduka diri.
“Tang pekara tu bepanggai ba konstitusyen lalu aku dipilih Yang di-Pertuan Agong nukar iya.-BERNAMA.
