Album Bujang Keling Sarawak dipenyadi 8 Sept

Dunya pemerindang lagu Iban terus richah nengah pemujur Smokehouse ngeluarka siti album kompilasyen ke pemadu baru diberi nama ‘Bujang Keling Sarawak’ ti deka dipenyadi enda lama agi.

Penatai album Bujang Keling Sarawak tu nya bepun ari siti pekit belagu ti diatur ba MK Smokehouse ba pun taun 2018 nyin suba.
Enam iku pemenang ari pekit nya diberi peluang ngerikod siti lagu siku ba album tu.

Enam iku sida ti dipilih nya Angela Ryann, Ester Jeffery, Reaza Ray Ho, Jeft Hardy, Mecklyen Julih enggau Roxanne Lee. Dikena ngenyukupka lapan iti lagu ba album nya, pengeluar album Lee Ramos ngambi Isa Lee enggau Sakura Diana Dawi. Reti nya, ba album Bujang Keling Sarawak bisi lapan iku penanyi; ti jarang-jarang nyadi ba album bukai naka diatu.

Nyadi pengawa tu disimpulka enggau jaku “NOTHING IS IMPOSSIBLE” (Nadai utai enda ulih) Jaku peransang nya selalu nyadi ke lalau lebuh kitai merambu tauka ngepunka nama-nama pengawa.

Enti kitai amat keran ke siti-siti utai nya, kitai enggau naka ulih ngiga akal enggau jalai bedayaka iya. Semua penanggul tetap bisi jalai dikena mutarka iya.

DEKA DIPENYADI…Album baru ti deka dipenyadika kena 8 September tu ila.

Taja pan pia, manah amat enti semua perambu enggau penemu kitai datai ari niat enggau ati ti lurus. Kebuah pia laban semina niat enggau pengawa ti lurus aja deka bulih pemujur enggau berekat ari Petara.

Lagu dalam album

Lapan iti lagu ba album Bujang Keling Sarawak tu iya nya Ambai Aku (Mecklyen Julih), Bujang Keling Sarawak (Angela Ryann), Tubai Pengerindu (Isa Lee), Joget Sama Ngati Kediri (Ester Jeffery), Dara (Jeft Hardy), Mulut Pulut Ati Keladi (Sakura Diana Dawi), Sanggup Nganti (Roxanne Lee) enggau Tanda Tanya (Reaza Ray Ho @ Raymond).

Album Bujang Keling Sarawak tau dikumbai kitai nyelai mimit laban sida sebuat ke dia bechampur bansa, bisi nya China, Orang Ulu, Bidayuh, Iban enggau penakan Iban-Cina-Filipino.

Lapan iti lagu ba album Bujang Keling Sarawak ngembuan rentak ti bebida. Ari genre joget, album tu mega bisi rentak rock lubah, fast rock, ballad enggau twist. Kedua, album tu ungkup ke semua orang; biak enggau tuai.

ARAP TERUS MUJUR…Lee Ramos (tiga kiba), Sakura Diana Dawi (tiga Kanan) begulai enggau bala kaban MK Smokehouse.

Ditanya baka ni gaya lagu ba album kompilasyen nya, Angela Ryann ke mai lagu Bujang Keling Sarawak madah nyau ka semua lagu dia bepun ari cherita ti amat nyadi.

“Lagu Bujang Keling Sarawak nya ngenang cherita maya ke bepangan suba. Kadang-kadang asap lia kitai tau datai enda disadang. Taja pan pia asap lia kitai mega tau lenyau enda ulih tagang.

“Iya nyadi ketegal mayuh kebuah. Ba aku pekara tu bepanggai ba jereki diri lalu enti pangan kitai nya sigi ukai agih jadi enggau kitai, iya tetap deka lenyau enda ulih ditagang. Petara udah ngatur sapa ungkup kitai ti bendar”, ku Angela nyaut tanya ti keterubah.

Mecklyen Julih, ke datai ari Miri madah lagu iya Ambai Aku mega siti lagu kena iya mulaika pengingat maya iya ke terubah bepangan suba.

“Maya kitai ke besulu, dunya tu sigi asai kitai ti empu. Semua jaku ti pansut ari mulut pan semua manis. Enti ulih, kitai sigi enggai medis ati pangan diri. Taja pan pia, dunya pan nemu bekalih laban semua danji enggau pangan diri tau berubah sebarang maya. Maya nya mih semua jaku enggau danji manis berubah pait nyadi empedu.

Nya alai semua utai ti nyadi ulih nyadi ke lalau dudi hari ila. Begadai-gadai mih maya bedanji enggau meri ati diri ngagai sulu kitai. Sehari tu iya sulu nuan tang pagila lusa iya tau nyadi sulu orang bukai. Maya nya mih gula ti manis tau nyadi masam”, ku Mecklyn becherita pasal lagu iya Ambai Aku.

Pengerami bejadi album

Pengawa bejadika album Bujang Keling Sarawak deka diatur kena 8 September 2019, pukul 8 malam ba MK Smokehouse, Kuching City Mall.

Temuai dipebasa dikangau bejadika album tu Presiden Persatuan Anak Seni Iban Malaysia (Pasima) Mervyn Tajem, lalu emcee ti udah ditagaka malam nya ila iya nya siku DJ ari Waifm Kuching, Jimbu Giman, .

Mensia mayuh ke bisi ati deka ngulu pengawa nya tau madah ngagai Lee Ramos ba lumur 019-8588565. Kelimpah ari beperindang enggau artis MK Smokehouse empu, mensia mayuh mega deka diperindang bala artis bukai lalu bisi mega pengawa nyabut tikit betuah.

Menijar MK Smokehouse Lee Ramos lebuh dipinta meri jaku terima kasih, madahka diri enda pechaya ulih ngeluarka album tu. Kebuah pia ku laban iya semina nganjung ati rindu tang nadai tentu penemu ba industri pemerindang.

“Ngena peluang tu aku deka meri besai terima kasih ngagai semua. Terima kasih ngaga Gibson ari Kaban Music Production (KMP) laban udah mantu ngeluarka album tu ngena label KMP.

“Terima kasih mega ngagai semua komposer, artis, penulis leka lagu enggau bala bukai ti semampai nyukung kami. Enggau tu aku arapka peminat lagu Iban ulih nyukung artis enggau album baru.

“Beli mih album ti original laban nya aja jalai ti dikena kitai nulung artis enggau industri. Terima kasih mega ngagai raban pemberita enggau semua Dj radio”, ku Lee Ramos.

Ngena peluang tu kitai arapka album kompilasyen Bujang Keling Sarawak terus mujur nyadi siti album ti diterima peminat lagu Iban di menua tu.

Pia mega bela besampi awakka “smokehouse” ti bukai ulih mega ngeluarka album sida. “Nothing is impossible”. Pechaya mih ba diri empu.