Album kompilasyen Sada Jauh Lemai ngundan bemacham genre lagu

Kompeni Rikoding Kaban Muzik Production (KMP) ti bepalan di Kuching iya nya siti kompeni ti majak dikelala peminat industri pemerindang lagu Iban.

Apin lama, KMP baru udah ngeluarka album ari penanyi penatai asal ari Pelilih Betong iya nya Richard Lee (Nuan Berega Ba Mata Ku) enggau Igu Anthony (Alah Laban Pengeraja) kena bulan September tu tadi.

Pemadu baru iya nya kena 07 November tu tadi, KMP udah ngeluarka siti agi album kompilasyen artis iya dikumbai Sada Jauh Lemai (SJL) ti dilancharka ba sebengkah restoran tebilang di Sri Aman.

“Leka enggau tiun lagu dalam album Sada Jauh Lemai (SJL) tu tebal agi ditengkebang penengkebang tebilang iya nya Jesley Jabu enggau Mathhius Mambang Majang sereta Bunggu Jutie.

“Kelimpah ari nya Cami Tan nyadi Pengatur Muzik lalu Larry Cyprianz nyadi Video Editor,”ku Jonez Mackean ti nyadi projek menijar ke mega siku ari artis ti bisi lagu dalam album kompilasyen tu.

ALBUM BARU…Dikumbai Sada Jauh Lemai dikeluarka Kaban Muzik Prduction.

Ngelansa enggau silik penumbuh SJL ku iya,asal idea datai ari randau ruai secangkir kupi maya berandau enggau Mathhius Mambang sebedau berengkah begigaka bakih bukai ti sama pengerindu lalu deka enggau rekoding.

“Pekara ti nyelai senentang album tu iya nya semua kami sebuat ti belagu dedia iya nya pengajar memagang.

“Lalu kami mega bekenaka puku ari kandi tanchut kami empu dikena ngemujurka album tu,”ku iya enggau tuchum lelegup.

Nangkan nya, lagu dalam album tu ngembuan bemacham rentak tauka genre muzik baka Pop,Twist, Cha Cha,Beguine, Rentak 60-an enggau Dangdut.

“Lagu dalam album SJL tu mega engkeman amat dikena ngansar ke kaki lebuh bisi pengerami di rumah panjai tauka maya begulu enggau diri sebala maya lepa.

“Nuju mensia mayuh tauka peminat ti deka meli Album Sada Jauh Lemai (SJL) tu tau ngelawa Laman Facebook Sada Jauh Lemai tauka bala raban artis dalam album tu.

“Kebuah pia,laban SJL tu nadai dijual sebelah kedai lalu semina ulih beli nengah chara dipadah datas tadi,” ku iya baru.

Penanyi bukai dalam SJL tu iya nya Lynn Gilbert (Sada Jauh Lemai),Jonez Mackean (Puchau Bukit Semitau),Lyzza Crystie (Nyeling Belalai),Ruby J (Enggai Saum Tangkai),Jang Jupong (Betutup Pintu),Igat Gelungan (Agi Tubah Berega),Edward Ruom (Makai Belalai Ari Tisi),Cicie Omar (Patah Tangga Tembawai Lama),Lesz Asie (Genggam Rat Ba Ati) sereta penanyi benama Bjay enggau lagu Anang Berumban.

Suara Sarawak