Album kompilasyen Sada Leka Sebana dipansut enda lama agi

Kaban Music Production (KMP) bisi ngeluarka album kompilasyen baru dikumbai Album Sada Leka Sebana.
Sekali tu, Suara Sarawak udah berandau enggau siku ari penanyi dalam album kompilasyen tu iya nya Qumang Carol.
Ku Carol, album Sada Leka Sebana tu siti album kompilasyen nya dikena ngenataika pengasai ati tauka pesan ngagai bala bukai nengah lagu.
Iya mega madahka album kompilasyen tu disadang deka pansut enda lama agi.
“Album tu ngundan sepuluh buah lagu iya nya semilan buah lagu solo tauka kediri lalu siti lagu bepadu nyawa.
“Semua lagu dalam album nya asil tengkebang siku penengkebang lagu tebilang iya nya Matthius Mambang.
“Semua leka lagu tu ditengkebang Matthius Mambang seduai Jessley Jabu.
“Tang, Derrick Warren mega bisi nengkebang sebuah lagu ti disadaka iya empu dalam album kompilasyen,” terang Carol.

SUKUNG MIH… Pengawa nyuaka CD Album Sada Leka Sebana ngagai Menijar Besai KMP, Gibson Richard.

BALA PENANYI
Dalam album kompilasyen nya, bisi tujuh iku penanyi iya nya tiga iku indu enggau empat iku lelaki.
“Penanyi indu baka May Franklyn, Angel A enggau aku empu (Qumang Carol).
“Penanyi lelaki iya nya Derrick Warren, Phil Michael, Patric Ingka enggau Nash Finsley.
“Dalam album tu, aku bisi nyadaka tiga buah lagu nyengkaum siti lagu bepadu nyawa enggau Nash Finsley.
“Pia mega, penanyi bukai baka May Franklyn enggau Derrick Warren bisi nyadaka dua buah lagu seraya Phil Michael, Angel A enggau Patric Ingka bela nyadaka siti lagu,” ku iya nerang lagu dalam album tu.
Carol madahka nadai mayuh penanggul nyadi sekumbang rikoding lagu dalam album tu.
“Puji Tuhan, pengawa rekuding lagu tu lanchar dipejalai laban nadai mayuh penanggul ditapi kami sebuat.
“Kami mega berasai temegah laban bulih mayuh penemu ari penengkebang lagu tebilang iya nya Matthius Mambang, Jesley Jabu enggau Jonez Mackean.
“Jonez Mackean ti nyadi pengatur seruran ngembing kami sebuat nentuka pengawa ngasilka album tu lanchar dipejalai.
“Cami Tan ari Ranyai Studio mega mayuh ngembing sereta ngajar kami lebuh rikoding lagu,” ku Carol ti berasai lantang ati pengawa tu mujur dipejalai.
Nambahka nya, Carol ngarika bala penanyi bukai dalam album tu meri terima kasih ngagai sida ti udah ngembing dataika album tu nyau deka pansut.
“Kami mujur rekuding semua lagu pengelama tiga minggu laban semua penanyi bisi kereja magang.
“Tebal agi, kami tu pengajar ba sekula kelimpah siku penanyi gawa nyadi polis enggau dua iku gawa nyadi pengelicha.
“Maya ujung minggu aja mih awak kami limping rekuding lagu dalam album tu.
“Kami sebuat berasai lantang ati laban album tu udah tembu diasil,” ku Carol madahka sida sebuat diatu lantang ati laban album udah tembu enggau deka pansut enda lama agi.
KENANG KAMI… Bala penanyi begambar ungkup kenang enggau penengkebang lagu iya nya Matthius Mambang enggau Jessley Jabu.

ARAPKA DITERIMA PEMINAT
Ngelansa silik, Carol madahka album tu ngundan bemacham genre.
“Tebal agi, genre pop. Pia mega bisi rentak Rock ballada, disco dut, beguine enggau rhumba.
“Bisi lagu ayun lundai enggau rentak ranchak ti manah dikena ngansarka kaki maya bisi pengerami,” ku Carol.
Berebak enggau nya ku Carol, sida sebuat nyengkaum penengkebang udah meri fokus sereta bebendar gawa nentuka album tu nadai penimpang.
Nya kebuah, Carol ngarika bala penanyi bukai ngarapka lagu tu diterima bala mayuh.
“Kami sebuat ngarapka lagu tu ulih merindang mensia mayuh kelimpah lagu dalam tu bisi kaul enggau pengidup siku-siku.
“Kami nadai juluk bukai kelimpah ngarapka lagu tu diterima enggau manah,” terang iya.
Kelimpah ari nya, Carol meri terima kasih ke peransang sida sebilik dataika pengawa tu mujur magang.
“Kami sebuat mega ransing agi rekuding lagu beduduk ari mayuh bala rindu ninga lagu kami pengudah kami ngeluarka teaser lagu ba media rama.
“Tu nyadika peransang ke besai reti ngagai kami.
“Terima kasih nuju bala ti udah nyukung pejalai kami dalam industri muzik tu,” ku iya mantaika pengaga ati diri.
Ba lansa bukai, Carol madahka lagu tu ulih dipinta bala peninga ba radio Cats Fm.
Nangkan nya, barang sapa ti deka ngudar vcd tu tau ngudar ba Facebook Pages RABAN ALBUM SADA LEKA SEBANA tauka ngudar ba sida empu laban album tu nadai dijual ba kedai CD.

Suara Sarawak