Alexsidi staring Nanga Lipus

KANOWIT: Penyikar siku nembiak mujur nyelamatka sebuah rumah panjai 13 pintu ari angus di Jalai Rantau Kemiding, ditu kemari.

Penusah angus tu nyadi urung pukul 6.20 lemai kemari ba dapur sebuah bilik Rumah Andreas, Nanga Lipus.

Ketuai Balai Bomba enggau Penyah Penusah Kanowit, Arrahman Chik madahka lebuh penusah angus tu nyadi, Alexsidi Wifred, 13 taun benung duduk ba ruai rumah panjai nya.

“Iya berumban ngagai dapur lebuh ninga bisi orang manjung sebedau ngambi kereban pemadam api pengudah meda api nyerarai deka nganguska dapur.

“Alexsidi ngena tiga kereban pemadam api pengudah dua enda ulih dikena.

“Berebak enggau nya, pemerani iya ukai semina ulih nyeliah penusah rumah angus tang mega ulih nyelamatka nyawa enggau reta tengkira sida serumah,” terang iya.

Suara Sarawak