Ali Biju nyadi Chairman Komiti Rumah Panjai KPKT

KUCHING: Kaban Ahli Parlimen Saratok, Ali Biju dipaduka Opis Menteri Pengawa Berumah enggau Kaunsil Kandang Menua (KPKT) nyadi Chairman Komiti Rumah Panjai Menua.

Menteri iya, Zuraida Kamaruddin madah tuju nyirika pangku pengawa tu ngambi beratika sistem berumah orang asli enggau mansik baru sistem berumah ke lebih moden laban mayuh rayat Sarawak diau ba rumah panjai.

“Pengawa nyiri tu deka ngelempaika pangku pengawa ngagai Ali Biju ngambi beratika sistem berumah orang asli enggau mansik baru sistem berumah ke lebih moden laban mayuh rayat Sarawak diau ba rumah panjai.

“Komiti tu ditumbuh ngambi ulih nguluka komuniti sereta mantu sida ba perambu polisi KPKT ungkup pemansang rumah panjai ngambi sida enda tinggal,” ku iya.

Iya mansutka pekara nya rambau pengawa nemuai ngagai Sarawak seraya mansik, meresa enggau ngemendar projek di Sarawak, kemari.

KELAI KEREJASAMA… Zuraida Kamaruddin begambar ungkup kenang begulai enggau Wilie Mongin sereta Ali Biju (kiba).

Zuraida mega madahka penemuai iya kitu seraya mansik enggau beratika peminta projek ari Kaban Parlimen Puncak Borneo enggau Kaban Parlimen Mas Gading.

“Aku udah ngemendar tiga projek ba tiga sitak iya ba Puncak Borneo penyampau RM3 juta dikena masang lampu jalai sepanjai 32 km ari Jalai Kota Padawan ngagai Kampung Annah Rais.

“Pia mega, projek ti udah dikemendar iya nya ba Pasar Bau dibaruh Parlimen Mas Gading ngaga sistem parit ti manah ngambika penusah bah enda nyadi lalu projek nya beungkus RM3 juta,” ku Zuraida.

Mandal Presiden Parti Keadilan Rakyat (PKR) mega madahka ungkup Parlimen Mas Gading, piak KPKT mega meri agih belanja penyampau RM500,000 dikena nyeleti jematan pemesai 30 meter ba Kampung Bodam.

“Piak KPKT udah ngemendar projek beungkus RM1 juta ti deka diberi ngagai Kampung Pinang Jawa dikena nyeleti jematan kampung ti udah repuk nya ngambika sebarang penusah enda nyadi enggau ngemuntangka pengawa rayat,” ku iya nambah.

Sama datai Kaban Parlimen Puncak Borneo, Willie Mongin enggau Kaban Parlimen Saratok, Ali Baju.