SARATOK: Penyandang Dun N.39 Krian, Datuk Ali Biju minta semua pengundi Dun N.39 Krian, Dun N.38 Kalaka enggau Dun N.40 Kabong di baruh Parlimen P.205 Saratok bela meri sukung ngagai semua chalun GPS ti bediri ditu.
“Enggau lurus ati aku nyurutka diri ari nyadi chalun Dun Krian lalu meri sukung penuh ngagai chalun GPS (Krian), Friday Belik,” ku iya madah nengah sebengkah penerang tadi.
Sebedau tu Ali ngaga pemutus bediri minta pilih ba sitak nya laban ngira peminta bala tuai komuniti enggau pengundi dia.
Ku iya, nyadi pengari rayat ti udah dipilih kenyau ari taun 2011, sukung teguh nya mih ti udah ngasuh iya mutus ati nampung pengawa ungkup pengelantang rayat enggau pemansang ekonomi di Saratok kelebih agi menua Krian empu.
“Taja pia, aku sedarka pemutus tu deka ngeruga pemanah kaul entara Bersatu enggau GPS.
“Ari nya tadi, aku udah minta sadang penemu enggau lalau ari bala tuai supreme parti sereta jamin ari Chairman Perikatan Nasional (PN), Tan Sri Muhyiddin Yassin pasal pemereti ati ba langkar besai politik nasional ti udah diaum entara PN enggau Datuk Patinggi Tan Sri Abang Johari Tun Operang ti nyadi Chairman GPS,” terang iya.
Ali mega madah, iya chukup andalka tuju utai ti udah dikeaumka nya dikena nampung enggau ngenegapka kaul entara PN enggau GPS.
