SARATOK: Serakup alumni sekula mangku tanggungpengawa besai nyaup piak sekula ngemujurka perambu dikena nyapai sebarang penyulut.
Ku Kaban Parlimen Saratok, Ali Biju, kaul kerejasama entara alumni enggau piak sekula nyengkaum Serakup Apai Indai enggau Pengajar (PIBG) endang beguna endar.
Iya bisi amat pengandal ngagai raban alumni ulih ngempung penemu lalu besaup gawa ngemansangka sekula baka udah dikereja Alumni Sekula Sekondari (SMK) Saratok ditu.
“SMK Saratok udah nyapai penyulut ba pelajar ti ngemegahka ati semua kitai taja tu sekula ba menua pesisir.
“Kitai mega nemu sereta sedarka mayuh penyuntuk ari sukut penyikap perengkaguna dikena ngajar enggau belajar kelimpah pengelantang nembiak ke diau bemalam ba buding.
“Tang sekula tu mih udah mayuh nempa raban professional, bepenau enggau pengereja landik ti gawaka pemansang menua ba pengawa dikereja sida,” terang iya.
Ali ke mega Adun Krian mansutka jaku tu lebuh nyadi temuai dipebasa lalu bejadika Pengerami Nyuaka Tepa Nembiak Nyulut SMK Saratok 2019 diatur ba Balai SMK Saratok ditu, pagi tadi.
