Alumni Voctech Betong begempuru 28 March tu

BETONG: Gerempung Alumni Voctech Betong deka ngempuru bala nembiak ti kala besekula dia ngambi sama mantu piak sekula.

Presiden iya, Abdul Rahim Junaidi madahka endur tu semampai deka dikenang laban ditu mih endur sida ngiga penemu enggau ngansah pengelandik ti beguna.

Nya kebuah ku iya, gerempung enggau kerejasama Unit Psikologi dan Kerjaya Kolej Vokasional (KV) Betong merambu ngatur Pengerami Makai Lemai Alumni Voctech Betong 2020.

“Naka diatu, gerempung tu chakah ngempung nembiak Voctech ti kala belajar ditu ari suba ti dikelala enggau Sekula Sekondari Vokasional (SMV) Betong nyentuk dikumbai KV Betong diatu.

“Kelimpah ari nya, tuju pengerami tu mega ngumpul belanja ngambi ulih nyaup sekula nempa rebak bisi penau enggau bepengelandik nengah bemacham aktiviti enggau program diatur ditu,” ku iya.

Berebak enggau nya, iya madahka gempuru betemu baru diperambu nya mega sebagi ari pengawa mai bala nembiak suba ngabas sekula ti udah lama ditinggal seraya betemu enggau bala pengajar sereta kaban lama.

Penerang silik bekaul pengerami makai lemai nya tau betanya ngagai Abdul Rahim Junaidi (013-8181719), Muhammad Zulfaqar Mazlan (014-5150956) tauka Sangin Juat (011-15861331).

Suara Sarawak