Aluska baru atur kereja ke mudah kena rampit Covid-19

BANGI: Institut Pengelikun enggau Pengerai Pengereja Menua (Niosh) minta raban pengaji ngaluska baru pekara bekaul atur kereja ba industri ke mudah kena rampit penyakit (Covid-19).
Chairman iya, Datuk Wilson Ugak Kumbong madahka tu nyengkaum pengereja ke bisi kontak semak enggau pesakit tauka sida ke ngabas kia ke bisi tanda kena rampit.
“Pengaji patut bisi tanggung pengawa enggau siruka pengelikun, pengerai enggau pengelantang bala pengereja lebih agi sida ke ngaji pengereja menua luar.
“Sida patut nentuka pengereja menua luar tu udah swab test lalu semina ngemendarka orang ke negatif aja kereja,” ku iya nengah penerang, tadi.
Ugak madah, lus pengereja, takah tubuh lebuh gawa enggau ngasika Atur Standard Pengawa (SOP) mega patut seruran dipatau enggau dititih.
“Kami mega deka ngingatka semua pengaji enggau pengereja ngasika atur ditetap ba Akta Keselamatan dan Kesihatan Pekerjaan (AKPP) 1994 sereta semua undang-undang bekaul pengereja.
“Disiplin diri empu ulih nyaup perintah nagang Covid-19 berampit ba endur kereja,” terang Ugak.