Alvernia Agnes, indai tunggal chunto

Ngembing pedagang bukai maju ba industri gaya idup enggau pengerai

SIBU: Berekat ari pengelurus ati bekunsika penemu ba penau nengkebang, pekara pengerai enggau pengawa nganta mujur ngangkatka nama Alvernia Agnes Lubat nyulut di menua tu.

Ku Alvernia, status indai tunggal mega enda nekul singkang iya ngemansangka diri ba dagang industri ngintu pengerai nengah bemacham penemu enggau pengelandik seraya ngembing raban indu bukai.

KERANJAI JARI

Sabun digaga ari kereban chulin baka madu endang ditemu manahka pengerai kulit kitai, ku Alvernia.

Nyadi pematih enggau pedagang ba industri gaya idup enggau pengerai tauka Lifestyle & Wellness Industry, ngena chap dagang Alvernia Enterprise ngeluar enggau nyual produk sabun pemajik, pedagang diembing Mara Sarawak ngemai raban indu di menua bela nempa enggau nengkebang produk ari keranjai diri empu.

SERVIS KOMUNITI… Bengkel Sabun diatur Alvernia ungkup Tadika Permata Kasih di Bintulu.

Berindik ari nya, iya meransang diri ngatur bengkel ngaga sabun ungkup raban indu kelebih agi indai tunggal di menua tu kelimpah ari bejualka produk sabun enggau kraf jari bukai.

“Nya kebuah aku keran amat bekunsika penemu, naka ulih aku ngajar enggau ngembing sida ti ngulu bengkel enggau kelas diatur aku.

“Ari pemanah timbal, mayuh udah penyereta bengkel ngaga sabun nempa pemujur ba dagang tu nyengkaum siku pedagang sabun tebilang menua tu, Cecelia Lagak,” ku Alvernia ngelansa.

PERANSANG

Ngenang diri nadai ngembuan pelajar tinggi ba sekula, Alvernia meransang diri ngiri penemu nengah pelajar pengelandik ti disediaka raban Mara baka Setipikit Pengelandik Malaysia (SKM).

“Diatu aku benung nampung pelajar ba SKM Estetik Tikas Dua, pengudah mujur nembuka pelajar pengelandik ba tikas satu kelimpah ngulu kus bekaul enggau dagang ti bisi diatur opis enggau ejensi ditu.

“Ngepunka singkang ari program Latih Penempa Pedagang (LPU) dalam taun 2018 lalu udah nya nyereta bemacham program pemansang pengawa dagang bukai ti diatur Mara Sarawak.

“Aku mega chakah ngatur kelas latih ungkup raban diselinting baka pedagang ti bisi ati ngaul diri ba pengawa pengerai enggau pemajik selampur Sarawak,” ku Alvernia, peranak asal Selangau.

PELAJAR SEUMUR IDUP

Nyikap diri ngena bemacham penemu, penau enggau pengelandik entara juluk besai Alvernia nentuka iya ulih besemekih enggau makit produk sabun enggau pemajik kemaya hari.

RABAN DISELINTING… Entara pengawa pengasih Alvernia ungkup raban indai tunggal ari Pitsa Bintulu, iya nya bengkel ngaga sabun nadai bebayar.

“Kelimpah ari ngajar enggau ngembing bala pedagang industri tu, aku mega nadai kala leju ngulu kelas dikena nambahka penemu.

“Ukai semua pekara ditemu kitai nya sebaka enggau pekara dikunsi bala pengajar. Nya kebuah aku seruran meransang bala penyereta enggau pelatih anang bepanggai ba siku pengajar aja.

“Penemu dikunsi mega bebida bemalinka peneleba siku-siku kitai. Pia mega asil keranjai jari siku-siku mega bisi bida, nyelai enggau nyulut agi,” tambah iya ti kala ngulu Kus Undang-Undang Ungkup Dagang diatur Institut Pengawa Dagang Menua (Insken) enggau Serakup Indu Bumiputera Dalam Dagang Enggau Profesyen Malaysia (Peniagawati).

SERVIS BUKAI

Kelimpah ari nyadi pematih ngaga sabun, Alvernia mega bisi pengelebih enggau penau bukai baka nyendiaka servis bukai dikena nambahka penatai pemisi enggau ngangkatka dagang diri sebaka enggau pedagang bukai.

“Aku bisi nyendiaka servis mindah kin kitu ba pengawa nganta, ngurut indu baru beranak sereta servis komuniti bukai.

PENGERING SEMENGAT… Anak tuai Alvernia ke diatu udah lepas Pom Enam kelimpah dua iku anak iya, lumur dua nampung pelajar ba MSRM Mukah lalu ke pengkuan belajar ba Pom Lima di SMK Kidurong.

“Ari servis tu aku ukai semina ulih ngansah pengelandik diri, tang mega ulih ngemai pengelantang ngagai orang bukai, nyendiaka servis nangkup peminta komuniti menua tu.

“Aku mega deka mantu barang sapa ti angkunka pengawa dagang kelebih agi indai tunggal ulih mujur ngemansangka ruang bilik sida taja idup timpang nadai laki, tang bala anak tau nyadi pengering sida nyapai pemujur,” tandu iya.

RENTAYAN DAGANG

Alvernia mega ngemeratka kaul enggau rentayan dagang begulai enggau bala bukai ngambi bela angkat enggau maju, ulih rembus ngagai makit entarabansa jemah, mekit produk bukai.

Ku iya, tu nyengkaum ngaul pengawa bekunsika penemu enggau peneleba enggau raban dalam industri kraf enggau sabun tu empu ti ngemeratka pemesai guna pengawa nyaga pengerai enggau penulin kereban dikena ngaga produk.

“Louis Wesley, Sam Anthony, Melissa Francis entara nama ti kala dikaul aku ngemajuka diri ba dagang produk pemajik enggau penganta tu.

“Aku temegah ati meda pemujur bala kami, angkun enggau keran ngemansangka industri tu nyengkaum bala pengajar ti udah pinchin gawa, raban indu gawa ngintu ruang bilik, raban indai tunggal sereta mega rebak nembiak,” ku Alvernia nyimpul jaku lebuh dirandau Suara Sarawak.

Suara Sarawak