KUCHING: Penyelai enggau pengalus produk asil keranjai jari Alvina Enap udah narit ati peranak ari Menua Jipun enggau Spain.

Lebuh dirandau, Alvina madahka produk asil keranjai jari iya udah dibeli peranak menua luar ba taun 2020.

Ku iya, lebuh nya iya bisi bejual ba Datai Langkawi begulai enggau bala pedagang kraf bukai ari Sarawak.

“Tambah mega, sida di Brunei pen kala meli produk asil keranjai jari aku tu.

“Diatu, aku benung ngaga tangu mit ke manah nyadika tepa lalu tangu mit nya deka dikirum ngagai menua Belgium.

“Enda nyangka amat peranak ari luar rindu meda pemanah keranjai jari enggau produk asal kitai baka tangu mit tu.

“Pemanah produk asal kitai baka tangu nya mandangka orang ari menua bukai pen rinduka produk asal kitai taja ditengkebang nyadi tangu mit ngambi engkeman nyadika tepa,” ku Alvina nerang lebuh ngepunka randau enggau Suara Sarawak.

Peranak asal Rumah Mang, Nanga Jagau Sungai Ngemah, Kanowit tu madah, iya landik ngereja sereta nengkebang tiga produk asal kitai Iban baka betusukka leka manik, kain burie enggau sugu tinggi.

Alvina, 28 taun madahka iya belajarka semua pengelandik nya nunda enggi orang bukai ke udah tembu lalu mega belajar ari sida ke bepenau ba pengelandik jari tu.

LANDIK BA TUNJUK JARI

Nya kebuah, Alvina deka nerang sentang tiga bansa produk asil digaga ari pengawa betusukka leka manik dientudi pengelandik nengkebang kain burie lalu kepenudi nya, pengelandik nengkebang sugu tinggi.

“Bekaul pengawa betusukka leka manik, aku bisi nengkebang tangu, marik bungai, sumpin enggau manik loom.

“Aku berengkah betusukka leka manik dalam taun 2014 tang suba sigi nusuk leka manik ungkup diri empu aja lalu apin teulihka runding deka bejualka produk kraf manik nya.

“Aku teulihka runding deka ngelakuka produk manik nya pengudah bala petunggal meli tangu ari aku.

“Pengudah meli tadi, sida meransang manah agi aku bejual lalu sida mega deka meli ari aku.

“Nyau berunding ga aku, manah agi ga aku berengkah bejualka produk manik tu sekali laban tudah diri endang udah landik nengkebang tangu tu.

Terang Alvina, lebu ga iya nyema nengkebang mayuh tangu enti enti dijual laban ari pengawa bejual nya ulih narit ati bala bukai ke udah meda pemanah keranjai jari iya.

Nambahka nya, iya madahka semua produk nya nadai ga bangat nyelai ari orang ambika banding, enti nya tangu agi ga baka orang bukai tang chura enggau bungai aja ke bisi bida.

Tang ku iya, enti nengkebang marik bungai enggau marik loom nya aja bisi penyelai laban mayuh orang empai nemu nengkebang baka nya lalu mayuh enda nemu chara nusuk manik baka nya.

Ku Alvina, tangu enggau marik bungai nya ditusuk iya lalu marik loom nya bisi ditusuk iya empu enggau bisi mega ditusuk anembiak iya, Lija Rakan ke nyaup betusukka marik loom ari taun 2020.

“Aku minta saup Lija betusukka marik loom laban deka ngerumban ngaga stok ke deka dijual.

BELAJAR ARI YOUTUBE

“Keterubah belajar nengkebang tangu tu, aku nunda bala ke udah tembu laban diatu mayuh endur beguro tauka belajar kelebih agi ba media rama baka beratika motif chura, ukir enggau bungai tangu nya.

“Chura enggau ukir tangu diatu mayuh dikunsi bala bukai sebelah media rama baka Facebook, nya ga ditunda aku.

“Enti betusukka leka marik bungai, marik loom enggau sumpin nya aku belajar ari Youtube.

“Diatu, kitai deka landik ba pengawa baka tu asal kitai ngembuan niat deka belajar laban muntang aja endur nunda pengawa nya baka ba Youtube, Facebook enggau pelasar bukai.

“Baka aku belajarka pengelandik tu ari Youtube, chara nengkebang dataika udah tembu endang bisi diajar magang, tunda aja nama kereban enggau rurun iya.

“Terubah aku nemu betusukka marik bungai suba, aku diajar Sylla Austine ba Sibu, aku minta ajar iya nusuk marik bungai nya laban chukup rindu meda keranjai jari iya.

“Pemulai belajar laban iya ke pulai ngagai Miri lalu aku diau di Sibu, aku semina nembuka marik nya nengah chara belajar online lalu belajar ari Youtube,” terang iya.

Ku Alvina, sekumbang Atur Mindah Betagang tu iya semina betusukka leka manik aja laban sebedau pandemik tu jarang amat ngereja pengawa tu laban kiruh bejalai ngajar orang bukai.

Iya mega madahka sebedau pandemik tu jarang amat betusukka leka manik laban pemulai ke ngajar nyau ga kiruh nyendiaka keresa kena ngajar ba hari bukai.

Alvina meli semua leka manik nya ba kedai bejualka leka manik empu di Kuching.

Iya mega madahka semua produk nya ngena leka manik toho Jipun lalu nya endang leka manik ti bekualiti.

PENYELAI PRODUK

“Pengelebih produk aku ke suah dipadahka bala ke udah meli nya madahka tangu ditengekabng aku chukup entap rekung iya, segala manah sereta tusun leka manik pen berurun sereta manah dipeda.

“Baka marik bungai enggau marik loom nya, tebal agi aku nunda ukir enggau bungai ari menua luar ke suah dipelajar aku ba Youtube,” terang Alvina baru.

Alvina nerang, iya deka nembuka tangu nya urung tiga minggu lalu iya deka nembuka marik loom nya pengelama seminggu enggau marik bungai nya ulih tembu pengelama lima hari aja.

Ngelansa pasal rurun nengkebang tangu, Alvina madah, terubah iya deka nguntin ubung dulu nitihka pemesai rekung udah nya baru iya ngeraut ujung ubung nya ngena lungga.

Udah nya, ujung ubung ke diraut ngena lungga nya tadi deka diunsut ngena dian.

Tuju kitai ngunsut ujung ubung nya ngambi nyamai endur kitai ngachukka leka manik.

Udah nya, Alvina deka nanchang semua ubung nya tadi ngagai tali rekung tangu nya, kepenudi nya iya berengkah nusuk leka manik nitihka ukir dikedeka kitai.

Tembu semua leka manik ditusuk baru iya ngaga pom-pom tauka dikumbai kitai langgu tangu nya.

Pengudah tembu ngaga langgu tangu nya baru iya nanchang ba tangu, nyadi nya meh chara iya nengkebang tangu.

“Terubah nengkebang tangu tu, aku semina meda orang sepiak rumah aku tang pemuas ke meda sereta nemu semua kereban dikena, aku lalu ngepun kediri.

“Tang diatu, aku suah betanya ngagai bala bakih, chukup gaga laban sida enda sanggu bekunsika penemu sereta chara nya ngagai aku.

“Aku mutus ati deka bedagang kenyau ari empat taun ke udah lalu ba taun 2019, aku ngaga lisin bedagangka kraf tu tang ke diatu, aku semina bejual ari rumah aja,” ku iya nerang.

PUH BELAJAR

Alvina madahka mayuh pemar ditapi iya sekumbang PKP tu baka pedis begigaka leka manik laban semua kedai tutup.

Nambahka nya, maya pandemik tu iya enda ulih bedagang ngagai menua bukai laban enda ulih bejalai entara pelilih.

Nya kebuah, iya madahka diatu semina ngandalka media rama aja endur ngelakuka semua produk kraf nya.
Taja pia ku iya, munyi ku jaku orang kemaya hari, laban ke diatu semua pengawa dikereja ba tunjuk jari magang bisi ga pemanah iya laban ulih bebelika leka manik tu ba online.

“Nyamai agi ga asai ati laban ulih bebelika leka manik enggau kereban diguna ba online taja nyangka lama kitai nganti.

“Kebuah pia laban enti nadai pelasar online tu, pedis amat deka ngerumban udar ke diterima ari bala penguna.

Enti besebutka untung ari pengawa bejualka produk kraf tu, Alvina madahka untung iya bisi ga dalam RM1,500 sebulan lalu produk pemadu laku nya tangu pengudah kes ke ngasuh orang begau kelebih agi di Sarawak tu.

Nya alai, barang sapa ke deka meda enggau meli koleksyen manik Alvina, kita tau meda ba Facebook Alvina Enap enggau Facebook Pages, Enap Enterprise.

“Terubah berengkah betusukka leka manik suba, indai aku bendar amat ngansak ngasuh aku bejual.

“Pama meh dikena mulaika rega manik udah dikena nengkebang tangu, marik loom enggau marik bungai.

“Bepun ari taun 2018, aku berengkah bejualka produk kraf manik tu pengudah bekelala enggau raban ke landik baka Roselind Ngali enggau Sandin Bennedict.

“Roselind Ngali enggau Sandin Bennedict nya orang ke suah ngembing sereta ngajar aku sentang chara bedagang lalu sama mega enggau bala pedagang kraf ke bukai.

“Nya alai, enggau peluang tu, aku meri besai terima kasih ngagai sida ke enda rangka penemu sereta enda leju ngembing enggau nyukung aku ngelama tu.

“Terubah ngepunka dagang suba, aku ngena puku RM350 dikena meli leka manik lalu aku meli tungkus besai magang laban enggau suah meli.

“Juluk ati aku deka ngemansangka dagang produk kraf tu ngagai tikas ke tinggi agi ngambi peranak ari menua luar ulih meli produk aku.
“Nengah chara tu, peranak ari menua luar ulih ngelala sereta rinduka pemanah enggau penyelai produk ari menua kitai Sarawak tu,” ku juluk ati Alvina.

ENDA RANGKA PENEMU

Ba taun 2019, Alvina kala bejual ba Aum Besai Leka Manik Borneo Entarabansa ba Kuching.

Lebuh nya, iya dibai Sandine Bennedict enggau Roseline Ngali mandangka produk kraf lalu sida tiga mega bekunsika nalan endur bejual.

Nangkan nya, ba taun 2020 iya kala dianjung gerup Atelier Sarawak bejualka produk kraf manik ngagai The Datai Langkawi.

Ba dia, Alvina madahka tebal agi temuai ari menua luar bisi datai lalu dia mega produk kraf manik iya mayuh dibeli bala temuai ari menua luar.

Ukai semina landik betusukka leka manik enggau bedagangka produk kraf, Alvina kala ngiri penemu ngagai bala bukai lebuh iya kala ngajar nusuk leka manik keterubah iya dibai Roselind Ngali ba menua Brunei.

“Berengkah ari ngajar bala di menua Brunei, kami duai berengkah ngajar ba menua bukai di selampur Sarawak tu lalu kala mega ngajar betusukka leka manik tu ngagai bala di Johor.

“Ba taun 2018, aku bisi ati enggau orang belajar nengkebang sugu tinggi lalu lebuh nya mega aku belajar ari Roselind Ngali laban iya bisi ngajar di Sibu.

“Pengudah belajar tadi, ba taun 2019 aku berengkah dibai iya ngajar nengkebang sugu tinggi nyentuk diatu tang maya pandemik tu, semua pengawa ngajar nya nyau tejanggal sereta diketu dulu.

“Kami duai mega bisi nengkebang sugu tinggi ungkup dijual lalu sama mega enggau kain burie.

“Sentang pengelandik nengkebang kain burie, aku belajarka pengelandik nya ari Sandin Bennedict lalu iya mega ngajar aku bejait sereta ngelekat kerubung tekuyung nya.

“Udah nya, Roselind Ngali enggau Sandin Bennidect mai aku ngajar orang nengkebang sugu tinggi tu.

“Ba taun 2019 mega, kami duai Roselind Ngali bisi ngatur Pengerami Makai Lemai Penempa Sugu Tinggi.

“Pengerami tu diatur dikena ngempung semua bala nembiak ke kala diajar kami duai lalu meri anugerah ngagai sida.

“Ba penemu aku, ekonomi digital kemaya hari ngembuan mayuh pengelebih laban ari nya raban indu muntang agi bejualka produk sida.

“Pesan aku nuju raban indu ke bukai, anang takut nguji sereta anang enggai belajarka pengelandik krafjari tu.

“Kebuah pia laban pengelandik tu tau nyadika dagang dikena nambahka penatai pemisi ruang bilik kitai,” ku jaku peransang ari Alvina.