KUCHING: Anak Dayak diperansang ngaul diri ba pengawa nyadi pemacha berita.

Pemacha berita TVS, Priscilla John madah, bansa Dayak nadai tentu mayuh gawa tauka ngaul diri ba pengawa nyadi pemacha berita.

“Ari sukut dipeda aku, chukup mimit kitai bansa gawa ngaul media.

“Kebuah pia laban bisi sekeda malu mantaika pengelandik diri lalu nyimpan pengelandik tu ungkup diri empu aja.

“Sida nadai ngembuan pengandal ati ti besai ngagai diri empu bedau nguji.

“Kitai enda tau neju pekara tu terus nyadi laban sapa agi ti deka dikeandal kitai ngetanka berita Iban enti enda ukai anak Dayak empu,” ku iya.

Priscilla mansutka jaku nya rambau dirandau pemberita.

Iya madah, pengawa macha berita ukai semina macha aja tang meseti nemu pekara ti deka dikenatai ngagai bala peninga.

“Ba pengawa macha berita tu, kitai meseti nemu pekara tauka isi berita ti deka dikenatai ngagai mensia mayuh lalu ukai semina macha aja.

“Kebuah aku madah munyi tu laban kitai nyadi pemansut berita ngagai mensia mayuh ninting hari.

“Nya alai, perati silik genap berita ti digaga dikena nyeliahka kitai meri penerang ti salah,” terang iya.

Priscilla mega meransang bala pemacha berita ngambi enda lembau belajar.

“Aku pen ukai orang ti landik ngena jaku Iban dalam tang bai ati ransing deka belajar, dia deh aku ngiga inisiatif dikena nambahka penemu diri.

“Aku ransing betanya ngagai sida ti bepenau sereta belajar ari bup.

“Enti kitai enda mereti ke pekara disebut diri, pekara tu deka mai reti ti bebida.

“Orang pen berasai alit ati lebuh mending pekara disebut kitai,” ku iya lebuh dirandau bekaul pengawa ngena jaku Iban dalam.

Nya alai, iya meransang bala nembiak Dayak ngemeran sereta ngaul diri ba pengawa nyadi pemacha berita.

“Juluk ati aku iya nya deka meda mayuh agi nembiak kitai Dayak ngaul pengawa nyadi pemacha pemberita.
“Enti aku ngetu gawa ditu dudi hari, aku deka meda mayuh agi nembiak Dayak nampung pengawa kami ditu enda ngira penempa,” ku iya.